Avropa İttifaqı ölkələrinin daimi nümayəndələri Rusiyaya qarşı sanksiyaların 20-ci paketini təsdiqləyiblər və Ukrayna üçün 90 milyard avro həcmində kredit ayrılmasını dəstəkləyiblər.

Son bir neçə ay ərzində Slovakiya və Macarıstanın mövqeyinə görə yeni sanksiyalar paketi bloklanmışdı. İndi isə Avropa İttifaqının 27 ölkəsinin hamısının daimi nümayəndəsi Rusiyaya qarşı yeni sanksiyaları dəstəkləyib.

“Həmçinin, Avropa İttifaqı Ukrayna üçün 2026–2027-ci illəri əhatə edən genişmiqyaslı kreditin yekun olaraq təsdiqlənməsi prosesində həlledici addım atıb. Bu məsələ də bir neçə ay ərzində Macarıstanın vetosu səbəbindən mübahisəli idi. Söhbət Avropa İttifaqının çoxillik büdcəsində dəyişikliyin təsdiqlənməsindən gedir. Proses yazılı prosedur formatında gedir və 23 aprelə qədər davam edəcək. Yazılı prosedur o deməkdir ki, Avropa İttifaqının bütün üzv ölkələrinin nümayəndələri sənədə ya imza atmalıdır, ya da rəsmi şəkildə imtina etdiyini bildirməlidir. Prosedur 24 saat ərzində – 23 aprel saat 12:00-a qədər davam edəcək. Əgər bütün ölkələr vaxtında imza atsalar, prosedur vaxtından tez bitə bilər. Prosedurun başa çatması Avropa İttifaqı tərəfindən qərarların yekun təsdiqi deməkdir” – media tərəfindən yayılmış məlumatda qeyd olunub.

Məlum olduğu kimi, Macarıstan və Slovakiya rus neftinin “Druzhba” neft kəməri vasitəsilə fiziki olaraq ərazilərinə çatmasını gözləyəcəklər. Müvafiq olaraq, yekun qərarın aprelin 23-dək qəbul edilməsi ehtimalı azdır.

Bundan əvvəl Slovakiyanın xarici işlər naziri İurai Blanar yalnız rus neftinin “Druzhba” boru kəməri vasitəsilə Slovakiyaya daxil olması şərtilə, ölkəsinin 20-ci sanksiyalar paketini dəstəkləməyə hazır olduğunu demişdi.

Macarıstanın hazırkı baş naziri Viktor Orban da Budapeştin Ukraynaya 90 milyard avroluq kreditə qoyduğu vetonu yalnız “Druzhba” boru kəməri vasitəsilə rus neftinin tədarükü bərpa edildikdən sonra ləğv edəcəyini bildirib.

Medianın məlumatına əsasən, Ukrayna bu gün “Druzhba” boru kəməri vasitəsilə neft tədarükünün bərpa olunduğunu təsdiqləyib.

Bununla yanaşı, “Azadlıq Radiosu”nun Brüssel bürosunun müxbirinin verdiyi məlumata əsasən, rus neftinin dəniz yolu ilə daşınmasına qoyulan qadağa Rusiyaya qarşı iyirminci sanksiyalar paketindən çıxarılıb.

Paketin nələri əhatə etdiyi hələ rəsmi olaraq məlum deyil. Medianın məlumatına əsasən, bu paketə rus neftinin daşınması və ticarətinə əlavə məhdudiyyətlər, dırnaqarası kölgə donanmasına qarşı sanksiyaların genişləndirilməsi, neft qiymətinin yuxarı həddi üzərində nəzarətin gücləndirilməsi, eləcə də rus banklarına qarşı sanksiyalar və rus maliyyə institutları ilə əməliyyatlara əlavə məhdudiyyətlər daxil ola bilər.

Avropa İttifaqı ölkələrinin daimi nümayəndələri Rusiyaya qarşı sanksiyaların 20-ci paketini təsdiqləyiblər və Ukrayna üçün 90 milyard avro həcmində kredit ayrılmasını dəstəkləyiblər.