Gürcüstanın basketbol millisi AvroBasket-in 1/8 finalında turnirin favoritlərindən biri hesab olunan Fransa yığmasını 80:70 hesabı ilə məğlub edərək tarixi nəticəyə imza atdı və qitə birinciliyinin 1/4 finalına vəsiqə qazandı.

Bir gün əvvəl Gürcüstanın potensial rəqiblərinin oyunu baş tutmuşdu – Finlandiya böyük sürpriz edərək Nikola Yokicin Serbiyasını məğlub etdi. Mətbuat konfransında fransız jurnalist Finlandiya millisinin baş məşqçisinə belə sual ünvanladı: “Çətin püşkünüz var, bu gün Serbiya, sonra Fransa, ardınca Almaniya…”

Məşqçi qısa cavab verdi ki, komanda AvroBasket-ə yaxşı hazırlaşıb.

Bizim sualımız isə belə oldu – əminsiniz ki, növbəti rəqib Fransa olacaq?

“Əmin deyiləm. Finlandiya da sübut etdi ki, böyük adlara malik komandalarla yaxşı yığmalar qələbə qazana bilirlər. Gürcüstan yaxşı komandadır və görək Fransaya nə göstərəcək”.

İlk dəqiqələrdən Gürcüstan Fransaya ciddi mübarizə təklif etdi. Fransızlar meydançanın heç bir hissəsində rahat oynaya bilmirdilər. Öz növbəsində, Kamar Boldvinin liderliyi ilə komandamız üstünlüyü ələ aldı və ilk hissəni 24:20 hesabı ilə qazandı. Maraqlıdır ki, 2011-ci ildən bəri ilk dəfə millimiz ilk hissədə 24 xal toplayıb ki, bu da ən yüksək göstəricidir.

Gürcüstan millisinin baş məşqçisi Aleksandr Cikiç liderlərin istirahətini maksimum dərəcədə qorumağa çalışırdı. İlk 20 dəqiqədə Bitadze 10 dəqiqə, Şengeliyə isə 13 dəqiqə oynadı. Tornike bu qısa müddətdə 13 xal topladı. Kapitan AvroBasket-də son 19 oyunun 16-da +10 xal əldə edib.

Pley-off oyunlarına xas olduğu kimi, üçüncü periodda vəziyyət daha da gərginləşdi. Komandalar müdafiəni gücləndirdilər və xal qazanmaq çətinləşdi. Fransızlar yalnız cərimələrlə bizim oyunçuları saxlaya bilirdilər, gürcülər isə xalları dəqiq atışlarla toplayır və dördüncü perioda 58:54 öndə girdilər.

Həlledici hissədə gah bir komanda irəli keçirdi, gah da o biri. Oyunun bitməsinə 2 dəqiqə 30 saniyə qalmış Qoqа Bitadze vacib üçxallıq atışla Gürcüstanı 3 xal önə çıxardı. Kamar Boldvin və Tornike Şengeliyə isə önəmli cərimə atışlarını dəqiq yerinə yetirdilər.

Oyunu Tornike Şengeliyə və Kamar Boldvin hərəsi 24 xalla başa vurdu. Sandro Mamukelaşvilinin 14, Qoqа Bitadzenin 8, Beka Burcanadzenin 6, Giorgi Şermadinin isə 4 xalı var idi.

Nəticədə, Gürcüstan millisi rəqibinə yaxınlaşmağa imkan vermədi və tarixi nailiyyətə imza atdı – ilk dəfə AvroBasket-in 1/4 finalında oynayacaq. Rəqib Finlandiya millisi olacaq. Komandalar arasındakı oyun sentyabrın 10-da, Tbilisi vaxtı ilə saat 22:00-da başlayacaq və birbaşa yayımla Birinci Kanal tamaşaçılara təqdim edəcək.