Gürcüstan millisi 2 sentyabrda, Tbilisi vaxtı ilə 19:15-də AvroBasketdə Kiprlə oynayacaq. Canlı reportajı Gürcüstanın Birinci Kanalı və Birinci Kanal Sport təqdim edəcək.

Növbəti mərhələyə yüksəlmək üçün Kiprə qalib gəlmək vacibdir. Xatırladaq ki, altı komandadan ibarət qrupdan dördlük səkkizdəbir finala keçir. Gürcüstanın bir qələbəsi var.

Baş məşqçi Aleksandar Dikiç ötən tur Yunanıstana qarşı əsas oyunçuları istirahət etdirdi – Qoga Bitadze meydana çıxmadı, Tornike Şengeliyanın isə yalnız bir neçə dəqiqə oynamasına imkan verildi.

Daha sonra serbiyalı mütəxəssis bildirdi ki, komanda dəqiq bilir hansı məqsədi var və nəticəyə nail olmaq üçün nə lazımdır. Kipr yığması cari AvroBasketin ən zəif iştirakçılarından biridir, ev sahibi komanda keçirdiyi üç oyunun hamısını mübarizəsiz uduzub. Gürcüstan millisi ilk turda Avropanın hazırkı çempionu İspaniyanı məğlub etdi, sonra isə İtaliya və Yunanıstana uduzdu.

Qarşılıqlı görüşlər:

Hazırda Gürcüstan favorit sayılır, lakin vaxtilə Kiprə də uduzub: 2000-ci ildə məhz Kiprdə keçirilən AvroBasketin seçmə mərhələsində bizim komandaya Kiprə qalib gəlmək lazım idi, oyunu son saniyələrədək öndə aparırdı, lakin ada təmsilçiləri mərkəzdən üçlük ataraq hesabı bərabərləşdirdilər və əlavə vaxtda qalib gəldilər – 80:75. O zaman altı komandadan ibarət qrupdan seçməyə Kipr və Danimarka keçdi, Gürcüstan isə ikinci seçmə mərhələdə oynamaq məcburiyyətində qaldı.

Bir il əvvəl, elə ilk seçmələrdə Gürcüstan Kiprə 72:69 hesabı ilə qalib gəlmiş və növbəti mərhələyə Çexiya ilə birlikdə çıxmışdı.

Budur vəssalam – Kiprlə bundan başqa görüşümüz olmayıb. Qarşılıqlı görüşlərdə hesab 1:1-dir. AvroBasket 2025-də isə biz irəliləməliyik.

Şərhlər:

Aleksandar Dikiç, Gürcüstan millisinin baş məşqçisi:

“Üçüncü turdan öncə iki seçimimiz vardı: ya Yunanıstana qarşı sona qədər mübarizə aparmalı və bütün enerjimizi sərf etməliydik. Ya da sağlamlıq və gücün qorunmasını düşünməli, diqqəti son iki matçın (Bosniya və Herseqovina və Kiprə qarşı) qələbəsinə yönəltməliydik. Mən ikinci yolu seçdim. Kipr bütün oyunlarını uduzub, amma bu o demək deyil ki, bizə asan olacaq. Dediyim kimi, son iki matç üçün maksimum konsentrasiyanı təmin etməliyik.”

Xristoforos Livadiotis, Kipr millisinin baş məşqçisi:

“Gürcüstan millisindən müxtəlif üzü gördük. Məsələn, açılış turunda tam başqa komanda idi, Avropa çempionlarına qarşı fantastik oynadılar, İtaliyaya qarşı ilk hissə də çox yaxşı idi, amma həmin oyunun ikinci yarısı və Yunanıstana qarşı matç uğurlu alınmadı. Mənim fikrimcə, onların yaxşı işlənmiş taktikası var və ağıllı şəkildə hərəkət edirlər. Görünür, Gürcüstan hansı oyunlarda qalib gəlməli olduğunu seçib və buna görə oynayır ki, növbəti mərhələyə çıxsın. Sizə deyim ki, gürcü basketbolçuların kifayət qədər təcrübəli məşqçisi var və o, nə etdiyini yaxşı bilir.”