2008-ci ilin Rusiya-Gürcüstan müharibəsindən 17 il keçdi. Gürcüstan Prezidenti, baş nazir, hökumət və parlamentin üzvləri bu gün Muxatqverdi qardaşları qəbiristanlığında avqust müharibəsində həlak olanların xatirəsini ehtiramla yad ediblər. Onlar qəhrəmanların memorialını əklillə bəzəyiblər və müharibədə həlak olan hərbçilərin ailə üzvlərinə başsağlığı veriblər.

2008-ci ilin avqustun 7-də separatçılar gürcü kəndlərini intensiv şəkildə bombalamağa başladılar, bu da cavab atəşinin açılması, avqustun 8-də isə Rusiya işğalçı ordusunun ölkəyə daxil olması ilə müşaiyət olundu. Rusiyanın Gürcüstana qarşı apardığı müharibə nəticəsində 411 nəfər həlak oldu, 130 000-ə yaxın vətəndaş didərgin düşdü, kəndlər məhv oldu, Qori şəhəri və strateji obyektlər bombalandı. Gürcüstan ərazilərinin 20 faizi hələ də Rusiyanın işğalı altındadır.