“Associated Press”in məlumatına əsasən, Fransa avropalı sülhməramlıların Ukraynada cəbhə xəttindən uzaqda, Dnepr çayı boyunca yerləşdirilməsini istisna etmir

“Associated Press”in məlumatına əsasən, Fransa avropalı sülhməramlıların Ukraynada cəbhə xəttindən uzaqda, Dnepr çayı boyunca yerləşdirilməsini istisna etmir. Anonim mənbənin verdiyi məlumat üzrə, avropalı komandirlər bir neçə ssenari üzərində işləyirlər və dövlət liderlərinə təqdim edəcəklər.

Fransanın dəstəklədiyi mümkün variantlardan biri, koalisiya üzvləri tərəfindən mərkəzi Ukraynada, Dnepr çayı boyunca, cəbhə xəttindən uzaqda əhəmiyyətli qüvvələrin yerləşdirilməsidir.

“Associated Press”in məlumatına əsasən, həmçinin nəzərdən keçirilən digər mümkün variantlar arasında dəstək qüvvələrinin cəbhədən daha da uzağa, Ukraynanın uzaq qərbində və ya qonşu ölkədə yerləşdirilməsi də var.

Britaniyalı rəsmi şəxslər bu qüvvələrin 10 000-dən 30 000-ə qədər hərbi qulluqçudan ibarət ola biləcəyini bildiriblər.

Fransa Prezidenti Emmanuel Makron Avropa hərbi kontingentinin cəbhə xəttində yerləşdirilməyəcəyini bildirib. Onun bəyanatına əsasən, “Bu qüvvələr rusları təkrar hücumlardan çəkindirəcək. Və mühüm şəhərlərə və strateji bazalara nəzarət etməklə, bir neçə Avropa hökumətinin və müttəfiqlərin açıq dəstəyini vurğulayacaqlar”.

“Ona görə də biz ön xəttdə deyilik, müharibə etmək üçün getmirik, lakin biz orada uzunmüddətli sülhün təminatı üçün varıq. Bu, pasifist yanaşmadır. Bu məqamda münaqişəyə, müharibə vəziyyətinə səbəb ola biləcək yeganə tərəf ruslar olacaq, əgər onlar yenidən təcavüzə başlamaq qərarını versələr” – Makron qeyd edib.