“Associated Press” – Amerika Birləşmiş Ştatları sonuncu təyyarədaşıyan gəmisini Sakit okeandan Yaxın Şərqə keçirib

Amerikanın “USS George Washington” təyyarədaşıyan gəmisi Qərbi Sakit okeandan Yaxın Şərqə doğru hərəkət edir. Bu səbəbdən Çinin hərbi fəallığının artması fonunda Asiya-Sakit okean regionunda ABŞ-nin təyyarədaşıyan gəmisi olmayacaq – bu barədə məqaləni “Associated Press” dərc edir.

Nəşrin məlumatına əsasən, “USS George Washington” Yaxın Şərq regionunda İrana qarşı ABŞ və İsrailin birgə əməliyyatı başladıqdan bəri orada olan “USS Abraham Lincoln” gəmisini əvəz edəcək.

Medianın məlumatına əsasən, əgər Hərbi Dəniz Qüvvələri bir neçə aydan sonra regiona daha bir gəmi göndərərsə, Sakit okeanda Amerika təyyarədaşıyan gəmilərinin döyüş qrupunun olmaması qısamüddətli ola bilər. Lakin hərbi analitiklər qeyd edirlər ki, İrana qarşı qeyri-müəyyən müddətə davam edən əməliyyatlar amerikalı dənizçilər üçün son dərəcə yorucudur.

“Associated Press”in yazdığı kimi, ABŞ Hərbi Dəniz Qüvvələrinin 11 təyyarədaşıyan gəmisi var və bir qayda olaraq, eyni vaxtda bir yerə onların iki və ya üçünü yerləşdirir.

Avqustun 16-da bəlli olub ki, ABŞ Mərkəzi Komandanlığının rəhbəri bu il Yaxın Şərqdə ikinci dəfə yerləşdirilən “USS Abraham Lincoln” gəmisinə baş çəkib. O, adətən olduğundan daha uzun müddət rotasiyada idi. İrana qarşı müharibədə aktiv iştirakı səbəbindən heyətin istirahəti üçün limanlara daxil ola bilmirdi. Mediada dənizçilərin anonim şəkildə su təchizatı sistemindəki problemlərdən, gigiyena məhsullarının çatışmazlığından və müəyyən dərəcədə qida çatışmazlığından şikayət etdikləri barədə məlumatlar yayılırdı. Medianın məlumatına əsasən, ağır psixoloji stres keçirən heyətin iki üzvü, ehtimal ki, intihar cəhdi zamanı dənizə tullanıb.