Ermənistanın xarici işlər naziri Ararat Mirzoyan bu gün Brüsseldə Ermənistan və Avropa İttifaqının strateji tərəfdaşlığın yeni gündəliyini imzaladıqlarını bildirir. Mirzoyan bu barədə sosial şəbəkədə yazır.

“Bu gün Ermənistan-Avropa İttifaqı tərəfdaşlığının yeni strateji gündəliyini imzaladıq, bunun nəticəsində də tərəfdaşlığımızın gündəliyi strateji səviyyəyə keçdi və münasibətlərin yeni fəslini açırıq. Vətəndaşlarımız üçün əhəmiyyətli nəticələr əldə etmək üçün ortaq baxış və məsuliyyətlə daha iddialı mərhələyə daxil oluruq” – Mirzoyan yazır.

Bundan əvvəl, genişlənmə məsələləri üzrə Avropa komissarı Marta Kos yeni gündəliyin Ermənistanın iqtisadi inkişafı və institutlarının gücləndirilməsinə kömək edəcək yardımı əhatə etdiyini bildirib. Ermənistan-Avropa İttifaqı Strateji Tərəfdaşlığının gündəliyi müdafiə və təhlükəsizlik sahəsində əməkdaşlığı da əhatə edir.

Marta Kosun qeyd etdiyi kimi, Avropa İttifaqı qarşıdan gələn parlament seçkilərindən əvvəl mümkün hibrid təhdidlərin öhdəsindən gəlinməsində, dezinformasiya və kiberhücumlarla mübarizədə Ermənistana dəstək verəcək. Bu məqsədlə Avropa İttifaqı Ermənistana 12 milyon dollar ayıracaq.