Gürcüstan hakimiyyəti Strasburqda növbəti qələbəsini qazandı, bununla da Gürcüstanın ərazi bütövlüyü bir daha təsdiqləndi – bu haqda Gürcüstanın ədliyyə naziri Anri Oxanaşvili nazirlikdə keçirilən brifinqdə deyib.

Oxanaşvilinin bəyanatına əsasən, Strasburq Məhkəməsi “Taqanova və digərləri Gürcüstan və Rusiyaya qarşı” işi üzrə qərarı dərc edib, ona əsasən işğal olunmuş Abxaziya ərazisində mülkiyyət hüquqlarının pozulması faktlarına görə tam məsuliyyət Rusiyanın üzərinə yüklənib.

“Qeyd olunmuş iş üzrə şikayət edən fiziki şəxslərin iddiası işğal olunmuş Abxaziya ərazisində mülkiyyətlə bağlı məsələlərə aid olub. Strasburq Məhkəməsinin bugünkü qərarı bir daha təsdiqlədi ki, Rusiya işğal olunmuş ərazilərdə insan hüquqlarının pozulmasına görə tam məsuliyyət daşıyır, çünki Rusiya bu günə qədər işğal etdiyi Abxaziya ərazisində effektiv nəzarəti həyata keçirir. Strasburq Məhkəməsi vurğuladı ki, beynəlxalq hüquqa əsasən Abxaziya Gürcüstanın ayrılmaz hissəsidir, lakin 1990-cı illərdən etibarən Gürcüstan hakimiyyəti Rusiyanın hərbi, iqtisadi və siyasi müdaxiləsi səbəbindən ona effektiv nəzarət edə bilmir.

İşğal olunmuş Abxaziya ərazisi üzərində Gürcüstanın effektiv nəzarəti həyata keçirə bilməməsinə baxmayaraq, Strasburq Məhkəməsi Gürcüstan hakimiyyətinin Abxaziyada şəxslərin mülkiyyət hüquqlarını qorumaq üçün bütün mümkün və ağlabatan tədbirləri gördüyünə xüsusilə işarə etdi. Avropa Məhkəməsinin bugünkü qərarı ilə Gürcüstan hakimiyyətinin 2012-ci ildən bəri həyata keçirdiyi ağlabatan və sülh yolu ilə işğaldan azad edilmənin həqiqiliyi bir daha təsdiqləndi.

Cəmiyyətimizi işğala qarşı bu növbəti dövlət zəfəri münasibəti ilə təbrik edirəm. Buradaca fürsətdən istifadə etmək və Ədliyyə Nazirliyinin əməkdaşlarına dövlət maraqlarının müdafiəsinə verdikləri töhfəyə görə təşəkkür etmək istəyirəm” – Anri Oxanaşvili bildirib.