Əgər ABŞ Prezidenti Donald Tramp Qrenlandiya üzərində nəzarəti bərqərar etmək üçün hərbi əməliyyat aparsa, bu, NATO-nun müdafiə alyansı kimi sonu deməkdir – bu haqda müdafiə məsələləri üzrə Avropa komissarı Andrius Kubilius deyib.

“Danimarkanın Baş naziri ilə razıyam: əgər bu baş verərsə – baxmayaraq ki, bunun baş verə biləcəyinə inanmıram – əgər Amerika administrasiyası Qrenlandiya üzərində nəzarəti bərqərar etmək üçün güc tətbiq edərsə, bu, həqiqətən də bütün transatlantik ittifaqın və NATO-nun sonu olacaq. ABŞ administrasiyası bunu yəqin ki, çox yaxşı başa düşür” – o, bildirib.

Kubiliusun sözlərinə əsasən, əgər Amerika Birləşmiş Ştatları həqiqətən Qrenlandiyanın və ya regionun təhlükəsizliyini gücləndirmək istəyirsə, oradakı hərbi bazalarını genişləndirə bilər.

“Mən səmimi şəkildə inanıram ki, Birləşmiş Ştatların NATO-lu müttəfiqlərinə və transatlantik tərəfdaşlarına qarşı sərt davranmasının, bütün norma və razılaşmaları görməzdən gəlməsinin mümkün olmadığını anlamaq üçün rasionallığı və sağlam düşüncəsi olmalıdır. Axırda, bu halda, paradoksal bir sual ortaya çıxır: əgər Birləşmiş Ştatlar Qrenlandiyaya qarşı hərbi güc tətbiq etsə, NATO üzvü olaraq Birləşmiş Ştatlar nə edəcək? Axı NATO üzvlərindən birini, yəni Danimarkanı və onun ərazilərini istənilən təcavüzdən qorumalıdır” – Kubilius bildirir.