Andrey Sibiga bildirib ki, Moskva döyüş əməliyyatlarının dayandırılması ilə bağlı digər dövlətlər və beynəlxalq təşkilatlar tərəfindən dəstəklənən real və ədalətli çağırışı bir daha görməzliyə vurub.
Ukraynanın xarici işlər naziri qeyd edib ki, prezident Volodimir Zelenskinin Rusiyaya təklif etdiyi atəşkəs rejiminin qüvvəyə minməsinə baxmayaraq, Rusiyanın Ukrayna vilayətlərinə hücumları bütün gecə davam edib.
“ Moskva döyüş əməliyyatlarının dayandırılması ilə bağlı real və ədalətli çağırışı yenidən görməzliyə vurdu. Bu göstərir ki, Rusiya sülhü rədd edir və onun 9 may üçün etdiyi saxta atəşkəs çağırışlarının diplomatiya ilə heç bir əlaqəsi yoxdur. Putini yalnız hərbi paradlar maraqlandırır, insanların həyatı yox,” – deyə Sibiga sosial şəbəkədə yazıb.
Ukraynanın xarici işlər naziri beynəlxalq ictimaiyyəti Rusiyaya təzyiqi artırmağa çağırıb.
“Belə davranış güclü təzyiq tələb edir, o cümlədən yeni sanksiyalar, təcrid, törədilmiş cinayətlərə görə məsuliyyətin müəyyən edilməsi və Ukraynaya bütün sahələrdə daha güclü dəstək,” – deyə Ukrayna XİN rəhbəri bildirib.