Almaniya hökumətində Rusiyanın günün sonuna qədər Ukraynada atəşkəs tətbiq etməməsi halında, Avropanın yeni sanksiyalar hazırlamağa başlayacağını bəyan edirlər

Rusiyanın günün sonuna qədər Ukraynada atəşkəs tətbiq etməməsi halında, Avropa yeni sanksiyalar hazırlamağa başlayacaq – bu barədə
Almaniya hökumətinin mətbuat katibi Ştefan Kornelius mətbuat konfransında bildirib.

“Saat irəliləyir. Günün bitməsinə hələ 12 saat qalıb və bu vaxta qədər atəşkəs olmasa, Avropa tərəfi sanksiyalar hazırlamağa başlayacaq” – Almaniya hökumətinin mətbuat katibi bildirib.

Ötən həftənin sonunda Kiyevdə keçirilən görüşdən sonra Fransa, Almaniya, Polşa, Birləşmiş Krallıq və Ukraynanın liderləri bəyan ediblər ki, mayın 12-dən “ən azı 30 gün ərzində tam və qeyd-şərtsiz atəşkəs” elan edilməlidir.

Öz növbəsində, Rusiya Prezidenti Vladimer Putin İstanbulda Rusiya-Ukrayna danışıqlarının keçirilməsini təklif edib. Bununla əlaqədar Ukrayna Prezidenti mayın 12-dən Rusiyadan atəşkəs gözlədiyini və şəxsən mayın 15-də Türkiyədə Kreml rəhbəri Vladimer Putini gözləyəcəyini bildirib.

Avropalı liderlərin bəyanatına baxmayaraq, Rusiya qüvvələri gecə Ukraynaya 100-dən çox dronla zərbə endirib və cəbhə xətti boyunca onlarla hücum həyata keçirib.