Gürcüstan Rusiyanın təcavüzünə qarşı tribunalın yaradılmasını dəstəkləmir. Sual olunur, Gürcüstan hökuməti kimin üçün işləyir, onların ağaları kimdir? Müxalifət liderlərinin həbsi Gürcüstan əhalisinin səsi deyil, bu, Kremlin pıçıltısıdır – bu barədə ukraynalı deputat, Avropa Şurası Parlament Assambleyasının üzvü Aleksei Qonçarenko Avropa Şurası Parlament Assambleyasının sessiyasında deyib.

Qonçarenko bildirib ki, onlar “Gürcüstanı Moskvadan xilas etmək və Gürcüstanı Gürcüstan əhalisinə qaytarmaq üçün hər şeyi etməlidirlər”.

“Üzv dövlətlərdən 6 ölkə Rusiyaya qarşı tribunalın yaradılmasını dəstəkləməyib və onlardan biri Gürcüstandır. Gürcüstanın özü Rusiyanın təcavüzünün qurbanıdır. Gürcüstan ərazisinin 20 faizi, demək olar ki, Ukraynada olduğu kimi Rusiya tərəfindən işğal olunub. Gürcüstan bizdən daha əvvəl Moskva rejiminin təcavüzünün qurbanı olub. Bundan sonra Gürcüstan Rusiyanın təcavüzünə qarşı tribunalı dəstəkləmir. Sual olunur, Gürcüstan hökuməti kimin üçün işləyir, onların ağaları kimdir?

Onlar müxalifət liderlərini həbs edəndə bu, Gürcüstan əhalisinin səsi deyil, bu, Kremlin pıçıltısıdır. Gürcüstan əhalisi Putinlə deyil, onların yanında olan liderlərə layiqdir. İndi baş verənlər məhz budur. Burada hamımız günahkarıq. 2008-ci il Ukrayna və Gürcüstanın NATO-nun qapısında dayandığı vaxt idi. NATO dedi: “Bəli, sizi qəbul edəcəyik, amma bilmirik nə vaxt”. Bir çox insan nə baş verdiyini anlamadı, Putin aydın şəkildə başa düşdü və 2008-ci ildən Gürcüstana, sonra isə Ukraynaya qarşı müharibəyə başladı. O, bu ölkələri məhv edir, hamımızı öldürməyə çalışır, bu ölkələri işğal etməyə çalışır. Hazırda o, Gürcüstanı hibrid şəkildə tutur, çünki Ukraynada indi çox məşğuldur. Bu, tanklar deyil, lakin kuklalardır, bunlar Gürcüstana qarşı hücum həyata keçirən Rusiyanın agentləridir. Bu, Bidzina İvanişvili deyil, bu, Lukaşvilidir, çünki Gürcüstandan Belarus yaradır. Bu, demokratiyasını itirmiş, sonra dövlətçiliyini itirmiş və indi işğal altında olan Belarusa bənzəyir. İndi Gürcüstanda məhz belə baş verir. Bir neçə ay əvvəl biz Qiorqi Vaşadzeylə və hazırda həbsdə olan digər liderlərlə görüşdük. Gürcüstanı Moskvadan xilas etmək, Gürcüstanı Gürcüstan əhalisinə qaytarmaq üçün biz hər şeyi etməliyik” – Aleksei Qonçarenko bildirib.