Ukraynalı döyüşçülər Donetsk vilayətində Pokrovskun şimal hissəsində 16 kvadrat kilometr ərazini geri alıblar – bu haqda Ukrayna Silahlı Qüvvələrinin baş komandanı Aleksandr Sirski məlumat yayır.

O bildirib ki, Rusiya ordusu əhəmiyyətli itkilərə baxmayaraq, hücum əməliyyatlarını dayandırmır, lakin əhəmiyyətli əməliyyat uğuru əldə edə bilmir.

Həmçinin, Sirski qeyd edir ki, Ukrayna ordusu işğalçıları Kupyanskdan geri çəkməyi və şəhərin demək olar ki, 90 faizinə nəzarəti ələ keçirməyi bacarıb.

“Düşmən 17 aydan çoxdur Pokrovsku ələ keçirməyə çalışır. Lakin, Ukrayna bölmələri xətti qoruyub saxlayır və təşəbbüsü geri alır. Əks-hücum əməliyyatları nəticəsində şəhərin şimal hissəsində 16 kvadrat kilometr əraziyə nəzarəti bərpa etdik. Həmçinin, Pokrovskun qərbində yerləşən Qrişino, Kotlino və Udaçnoye yaşayış rayonlarında 56 kvadrat kilometr ərazini geri qaytardıq” – Sirski bildirib.

Məlumat üçün bildirək ki, bir neçə aydır Pokrovsk şəhəri Rusiya-Ukrayna müharibəsinin ən qaynar nöqtələrindən biri olaraq qalır. Rusiya tərəfi dəfələrlə şəhər üzərində tam nəzarəti ələ keçirdiyini bildirib, rəsmi Kiyev isə bunu inkar edir.