“Al Jazeera” atəşkəs razılaşması elan edildikdən sonra Qəzza sektorunda İsrailin hərbi əməliyyatının 73 nəfərin həyatını itirməsi ilə nəticələndiyi haqda məlumat verir

 
Atəşkəs razılaşması elan edildikdən sonra Qəzza sektorunda İsrailin hərbi əməliyyatı 73 nəfərin həyatını itirməsinə səbəb olub. Bu haqda məlumatı “Al Jazeera” yayır.

Yayılmış məlumatlara əsasən, qurbanlar arasında 20 uşaq və 25 qadın var, 61 nəfər isə təkcə Qəzza şəhərində həlak olub.

İsrailin hərbi əməliyyatları nəticəsində son sutkada ərəb anklavında 230-dan çox insan yaralanıb. Ərəb mediasının məlumatına əsasən, xəstəxanalar, sığınacaqlar və yaşayış evləri İsrailin hərbi aviasiyasının hədəfinə çevrilib.

Yayılmış məlumata əsasən, hava zərbələri Qəzzanın cənubunda, Xan Yunis şəhərinə, eləcə də ərəb anklavının mərkəzi və şimal hissələrinə endirilib.

Ərəb mediasının məlumatına əsasən, İsrail ordusunun 2023-cü ilin oktyabrın 7-də Qəzzaya daxil olmasından sonra başlayan hərbi əməliyyatda azı 46 707 nəfər həyatını itirib, 110 265 nəfər isə yaralanıb. Bundan əvvəl “HƏMAS”ın İsraildə həyata keçirdiyi hücumlar zamanı azı 1139 nəfər həlak olub, 200-dən çox insanı isə əsir götürüblər.