ABŞ Silahlı Qüvvələri Karib hövzəsində bir gəmiyə zərbə endirildiyini açıqlayıb.

Məlumata görə, əməliyyat nəticəsində üç nəfər həlak olub.

Amerikalı hərbçilər sosial şəbəkədə yaydıqları paylaşımda bildiriblər ki, gəmi “narkotrafik əməliyyatlarında iştirak edirdi”.

Onların sözlərinə görə, ABŞ narkotik alverçilərinə qarşı mübarizəni bundan sonra da fəal şəkildə davam etdirəcək.

“13 fevral tarixində Cənub Komandanlığının rəhbəri, general Frensis L. Donovanın göstərişi ilə ‘Cənub Nizə ucu’ adlı birgə işçi qrupu terror təşkilatları tərəfindən idarə olunan gəmiyə ölümcül kinetik zərbə endirib. Kəşfiyyat məlumatları təsdiqləyib ki, gəmi Karib hövzəsində narkotrafikin məlum marşrutu üzrə hərəkət edirdi və narkotrafik əməliyyatlarında iştirak edirdi. Bu əməliyyat zamanı üç narkoterrorçu məhv edilib. ABŞ Silahlı Qüvvələrinin heç bir hərbçisi xəsarət almayıb,” – deyə bəyanatda bildirilir.