Ağ Ev məlumatına görə, hər iki tərəf Hürmüz boğazının enerji daşıyıcılarının sərbəst axınının təmin edilməsi üçün açıq qalması barədə razılığa gəlib.

Açıqlamada bildirilir ki, Çin lideri Si Cinpin həmçinin Çinin boğazın hərbiləşdirilməsinə və ondan istifadə üçün ödəniş tətbiq edilməsinə qarşı olduğunu açıq şəkildə ifadə edib və gələcəkdə Çinin Hürmüz boğazından asılılığını azaltmaq üçün ABŞ-dan daha çox neft almaqda maraqlı olduğunu bildirib.

Ağ Ev administrasiyasının məlumatına görə, hər iki ölkə İranın heç vaxt nüvə silahına sahib olmaması barədə də razılığa gəlib.

Ağ Evin rəsmisi həmçinin bildirib ki, Donald Tramp və Si Cinpin ABŞ-a fentanil prekursorlarının axınının dayandırılması üzrə irəliləyişin gücləndirilməsini, eləcə də Çinin ABŞ kənd təsərrüfatı məhsullarını daha çox almasını müzakirə ediblər.

Bəyanatda qeyd olunur ki, Tramp Si Cinpinlə “yaxşı görüş” keçirib. Tərəflər iqtisadi əməkdaşlığın gücləndirilməsi yollarını, o cümlədən ABŞ şirkətlərinin Çin bazarına çıxışının genişləndirilməsini və Çin investisiyalarının ABŞ sənayesində artırılmasını müzakirə ediblər. Görüşün bir hissəsinə ABŞ-ın bir neçə iri şirkətinin rəhbərləri də qoşulub.