ABŞ İran əleyhinə növbəti hava və dəniz zərbələri endirib

ABŞ İran əleyhinə növbəti hava və dəniz əməliyyatı həyata keçirib. ABŞ Mərkəzi Komandanlığının (CENTCOM) məlumatına görə, əməliyyat Şərq vaxtı ilə saat 22:00-da başlayıb və yeddi saat davam edib.

CENTCOM-un açıqlamasında bildirilir ki, ABŞ-ın qırıcı təyyarələri, pilotsuz uçuş aparatları və Hərbi Dəniz Qüvvələri İranın raket və pilotsuz uçuş aparatları infrastrukturuna, dəniz hərbi imkanlarına və sahil müdafiə sistemlərinə, o cümlədən Hörmüz boğazı ətrafındakı və sahilyanı ərazilərdə yerləşən hədəflərə dəqiq zərbələr endirib.

Amerika tərəfinin açıqlamasına görə, əməliyyatın məqsədi İranın beynəlxalq ticarət daşımalarına və mülki gəmi heyətlərinə təhlükə yaratdığı bildirilən hərbi imkanlarını daha da zəiflətmək olub.

ABŞ artıq ardıcıl dördüncü gecədir ki, İran ərazisində hərbi əməliyyatlar həyata keçirir. Bundan əvvəl Vaşinqton İran limanlarına gedən və oradan çıxan gəmilərə qarşı dəniz blokadasını da bərpa edib.