Ərzaq məhsullarının qiymətləri ilə bağlı baş nazir İrakli Kobaxidzenin rəhbərlik edəcəyi Hökumət Koordinasiya Komissiyası yaradılıb. Bu haqda məlumatı Hökumət Administrasiyası yayır.

Onların məlumatında, hökumətin dünənki iclasda müvafiq fərmanı təsdiqlədiyi deyilir.

Hökumət Administrasiyasının rəhbəri Levan Jorjolianinin dediyi kimi, müvafiq sektorların nazirləri, Hökumət Administrasiyası və Rəqabət Agentliyi komissiyanın tərkibində olacaq.

“Baş nazir ərzaq məhsullarının qiymət artımları ilə bağlı çox ətraflı danışdı və bu məsələnin daha dərindən araşdırılmalı olduğunu qeyd etdi, çünki qiymət artımları çox vaxt heç bir məntiqə tabe olmur və müvafiq olaraq, bu, istehlakçıya təsir edir. Hökumət komissiyası bu prosesin daha yaxşı əlaqələndirilməsi üçün yaradılıb” – Levan Jorjoliani bildirib.