Ռուսաստանին չի հաջողվի հաջողության հասնել Ուկրաինայի հետ պատերազմում, և որպես երկիր՝ չունի այնքան ազդեցություն, որքան Չինաստանը, իսպանական լրատվամիջոցների հետ զրույցում ասել է ԵՄ արտաքին քաղաքականության և անվտանգության գերագույն ներկայացուցիչ Ջոզեֆ Բորելը։

Բորելի խոսքով՝ Պուտինը մտադիր է զոհաբերել իր ժողովրդին՝ բանակին, անձնական և քաղաքական գոյատևման համար։ «Ահա թե ինչու են խաղաղ բանակցություններն այդքան բարդ», – ասել է Բորելը։

Միաժամանակ Ջոզեֆ Բորելը դրական է գնահատել Սաուդյան Արաբիայում ուկրաինական «խաղաղության բանաձեւի» շուրջ վերջին բանակցությունները և ընդգծել նաև Չինաստանի մասնակցությունը։

«Չինաստանը երբեք բարձրաձայն չի ասի, որ նվազեցնում է իր աջակցությունը Ռուսաստանին կամ նպաստում է նրա բացահայտ պարտությանը։ Պեկինին բոլորովին չի բավարարում ստեղծված իրավիճակը, համենայն դեպս միջուկային զենքի մասին հիշեցումով»,- ասել է Բորելը։

Ինչպես նշել է Բորելը, անհնար է համեմատել Չինաստանն ու Ռուսաստանը։

«Նախ Չինաստանը Ռուսաստան չէ։ Չինաստանը իրական աշխարհաքաղաքական դերակատարն է, մինչդեռ Ռուսաստանը տնտեսական գաճաճ է, ինչպես «բենզալցակայանը, որի սեփականատերը միջուկային ռումբ ունի», – ավելի ուշ ասաց Բորելը: