«Եվրոբարոմետր»-ի հետազոտության համաձայն՝ 2024 թվականի աշնան տվյալների համեմատ Վրաստանում ԵՄ-ի հանդեպ վստահությունը նվազել է 9%-ով։ Զեկույցի համաձայն՝ Վրաստանում հարցվածների 49%-ը վստահում է Եվրոպական միությանը։

«Եվրոբարոմետր»-ի ուսումնասիրությունն անցկացվել է Վրաստանում 2025 թվականի մարտի 27-ից ապրիլի 15-ը՝ ընդգրկելով 1011 մասնակցի։

2024 թվականի գարնանը անցկացված ուսումնասիրության համաձայն՝ Վրաստանում հարցվածների 66%-ը վստահություն ուներ Եվրամիության նկատմամբ, ինչը նշանակում է, որ վերջին մեկ տարվա ընթացքում ԵՄ-ի հանդեպ վստահության ցուցանիշը երկրում նվազել է 17%-ով։

Սոցիոլոգիական հարցման համաձայն՝ Վրաստանում հարցվածների 37%-ը հակված է անվստահության դեպի ԵՄ, իսկ 14%-ը պատասխանել է՝ «Չգիտեմ»։

Հարցվածների 43%-ը դրական վերաբերմունք ունի ԵՄ-ի նկատմամբ, 38%-ը՝ չեզոք, 18%-ը՝ բացասական, իսկ 1%-ը չունի պատասխան։

Հարցման համաձայն՝ Վրաստանում 2024 թվականի աշնանը կատարված հարցումից հետո 9%-ով նվազել է այն քաղաքացիների թիվը, ովքեր համարում են, որ երկրի ԵՄ անդամակցությունը լավ է։ Այդ ցուցանիշը այժմ կազմում է 60%։ Հարցվածների 7%-ը կարծում է, որ ԵՄ անդամակցությունը վատ է երկրի համար, իսկ 28%-ը գտնում է, որ դա ոչ լավ է, ոչ վատ։ Հարցվածների 75%-ը կարծում է, որ Վրաստանը կշահի ԵՄ անդամակցությունից՝ ինչը նախորդ հարցման համեմատությամբ 7%-ով նվազել է։

Սոցիոլոգիական հարցումը ցույց է տալիս, որ Վրաստանում հարցվածների 51%-ը վստահում է ազգային կառավարությանը, իսկ 44%-ը՝ ոչ։ Նույնպես, հարցվածների 48%-ը վստահում է ազգային խորհրդարանին, իսկ 45%-ը՝ ոչ։

Տնտեսական իրավիճակը երկրում բացասական է գնահատում հարցվածների 40%-ը, իսկ 56%-ը կարծում է, որ տնտեսական վիճակը Վրաստանում վատ է։ Հարցվածների 33%-ը համարում է, որ բնակարանային ծախսերն ու գնաճն են երկրի առջև կանգնած կարևորագույն խնդիրները, 19%-ը տնտեսական իրավիճակն է համարում ամենակարևոր հարցը, իսկ 24%-ը՝ գործազրկությունը։

«Եվրոբարոմետրը» հանրային կարծիքի հարցումների շարք է, որը Եվրոպական հանձնաժողովի և ԵՄ այլ ինստիտուտների պատվերով անցկացվում է 1974 թվականից սկսած՝ պարբերաբար։