Եվրամիությունը թույլատրել է Ուկրաինային օգտագործել 90 միլիարդ եվրոյի վարկի մի մասը՝ ամերիկյան Patriot հակաօդային պաշտպանության հրթիռներ գնելու համար
Եվրամիությունը թույլատրել է Ուկրաինային օգտագործել 90 միլիարդ եվրոյի վարկի մի մասը՝ ամերիկյան Patriot հակաօդային պաշտպանության հրթիռներ գնելու համար, հայտարարել է Եվրահանձնաժողովի նախագահ Ուրսուլա ֆոն դեր Լեյենը։
Նրա խոսքով՝ սա Կիևի համար արված բացառություն է, որը նախատեսում է Patriot համակարգերի համար կարևորագույն բաղադրիչների գնում։
Որոշումը թույլ կտա Ուկրաինային օգտագործել հաջորդ 3.2 միլիարդ եվրոյի վարկային տրանշը՝ ըստ ֆոն դեր Լեյենի՝ «ուժեղացնելու իր օդային տարածքի պաշտպանությունը ռուսական հարձակումներից»։
Այսօր ավելի վաղ Գերմանիայի պաշտպանության նախարար Բորիս Պիստորիուսը հայտարարել էր, որ Գերմանիան Ուկրաինային կտրամադրի լրացուցիչ Patriot հրթիռներ Բունդեսվերի պաշարներից։ Հրթիռները PAC-2 խափանող սարքեր են։
Ուկրաինային աջակցող երկրների պաշտպանության նախարարների տեսակոնֆերանսի ժամանակ Պիստորիուսը նաև նշել է, որ Բեռլինը կավելացնի օդ-օդ դասի հրթիռների մատակարարումը Ուկրաինա և կշարունակի անօդաչու թռչող սարքեր և հեռահար զինամթերք ուղարկել։
Ավելի վաղ Մեծ Բրիտանիան հայտարարել էր Ուկրաինայի օդային պաշտպանության համար 100 միլիոն ֆունտ ստեռլինգի լրացուցիչ օգնության փաթեթի մասին: Փաթեթը նպատակ ունի ամրապնդել Ուկրաինայի պաշտպանական կարողությունները՝ դիմակայելով Ռուսաստանի հաջորդ ձմռանը հարձակումներին և ներառում է ամերիկյան Patriot հակաօդային պաշտպանության համակարգերի համար նախատեսված հրթիռներ:
Ձեր տեղեկության համար, Եվրոպական Միության կողմից Կիևին տրամադրված 90 միլիարդ եվրո վարկի պայմանները սահմանում են, որ այդ միջոցները պետք է ծախսվեն հիմնականում եվրոպական արտադրության զենքի գնման վրա: