Եվրամիությունը և Մեծ Բրիտանիան հաստատել են Ռուսաստանի դեմ պատժամիջոցների 17-րդ փաթեթը
Եվրամիությունը և Մեծ Բրիտանիան հաստատել են Ռուսաստանի դեմ պատժամիջոցների 17-րդ փաթեթը։ Այս մասին X-ում գրել է Եվրամիության արտաքին քաղաքականության ծառայության ղեկավար Կայա Կալասը։
Կայա Կալլասի խոսքով՝ պատժամիջոցները ազդել են Ռուսաստանի «ստվերային նավատորմի» մոտավորապես 200 նավերի վրա։
Մեծ Բրիտանիայի կառավարությունը հրապարակեց ավելի մանրամասն հայտարարություն և նաև թարմացրեց պատժամիջոցների ցանկը։
«Վերջին պատժամիջոցները թիրախավորում են այն կազմակերպությունները, որոնք աջակցում են Ռուսաստանի ռազմական մեքենային, էներգիայի արտահանմանը և տեղեկատվական պատերազմին, ինչպես նաև ֆինանսական հաստատությունները, որոնք օգնում են ֆինանսավորել Պուտինի Ուկրաինա ներխուժումը», – հայտարարել է Մեծ Բրիտանիայի կառավարությունը։
Մասնավորապես, Մեծ Բրիտանիան պատժամիջոցներ է կիրառել 14 անձանց նկատմամբ, որոնց անվանում է «Սոցիալական ինժեներիայի գործակալության» անդամներ։ Արևմտյան երկրները այս գործակալությունը համարում են Ռուսաստանի միջամտության հիմնական գործիքներից մեկը Ուկրաինայի և այլ ժողովրդավարական երկրների քաղաքական գործընթացներին։
Ֆինանսական հաստատությունների շարքում բրիտանական պատժամիջոցների տակ են հայտնվել 46 ընկերություն, ինչպես նաև Սանկտ Պետերբուրգի արտարժույթի բորսան և «Ավանդների ապահովագրության գործակալություն» պետական կորպորացիան։
«Ստվերային նավատորմի» դեմ բրիտանական պատժամիջոցները ներառում են 18 նավ, ինչպես նաև բրիտանացի քաղաքացի Ջոն Մայքլ Օրմերոդին, ով, ըստ լուրերի, նավերը գնել է ռուսական նավթ տեղափոխելու համար։ Բացի այդ, պատժամիջոցները ազդեցին երկու ռուս տանկերի կապիտանի վրա։