Երևանում տեղի է ունեցել Վրաստանի և Հայաստանի պետական սահմանի սահմանազատման և սահմանագծման կառավարական հանձնաժողովների նիստը
Նոյեմբերի 6-ին Հայաստանի մայրաքաղաք Երևանում տեղի ունեցավ Վրաստանի պետական սահմանի սահմանազատման և սահմանագծման կառավարական հանձնաժողովի և Հայաստանի Հանրապետության պետական սահմանի սահմանազատման և սահմանագծման հանձնաժողովի նիստը։ Վրաստանի արտաքին գործերի նախարարությունը տեղեկատվություն է տարածել այս մասին։
Նախարարության տվյալներով՝ նիստը համանախագահել են Վրաստանի արտաքին գործերի փոխնախարար Լաշա Դարսալիան և ՀՀ արտաքին գործերի և միջազգային առևտրի փոխնախարար Վահան Կոստանյանը։
«Կողմերը դրական գնահատեցին հանձնաժողովների աշխատանքի վերսկսումը մի քանի տարի անց և ընդգծեցին պետական սահմանի սահմանազատման գործընթացի կարևորությունը Վրաստանի և Հայաստանի միջև բարիդրացիական հարաբերությունների հետագա խորացման համար։ Կողմերը հայտնեցին փոխադարձ հետաքրքրություն գործընթացը երկխոսության միջոցով և կառուցողական ոգով ավարտելու հարցում։
Հանդիպման ընթացքում կողմերը նաև մտքեր փոխանակեցին իրավական հարցերի, այդ թվում՝ համաձայնեցված արձանագրությունների և ապագայում հնարավոր լրացուցիչ քայլերի վերաբերյալ, որոնք կնպաստեն գործընթացի արդյունավետ իրականացմանը», – նշվում է տեղեկատվության մեջ։
Վրաստանի արտաքին գործերի նախարարության տվյալներով՝ կողմերը քննարկել են նաև սահմանազատման գործընթացի շարունակությունը և հանձնաժողովների հետագա աշխատանքը։