ԵՄ առաջնորդները համաձայնեցին հոգալ Ուկրաինայի անհետաձգելի ֆինանսական կարիքները, սակայն չկարողացան համաձայնության գալ Կիևին վարկեր տրամադրելու համար ռուսական սառեցված ակտիվներն օգտագործելու հարցում
ԵՄ առաջնորդները համաձայնել են հոգալ Ուկրաինայի անհետաձգելի ֆինանսական կարիքները հաջորդ երկու տարիների ընթացքում, սակայն չեն կարողացել համաձայնության գալ Կիևին խոշոր վարկ տրամադրելու համար սառեցված ռուսական ակտիվներն օգտագործելու հարցում, հաղորդում է Reuters-ը։
Գործակալությունը հաղորդում է, որ որոշումը խոչընդոտվել է Բելգիայի կողմից արտահայտված մտահոգությունների պատճառով։
Ինչպես գրում է Reuters-ը, գագաթնաժողովից հետո հրապարակված հռչակագրի տեքստը «մեղմացվել» է նախորդ տեքստերի համեմատ։
«Եվրոպական խորհուրդը պարտավորվում է հոգալ Ուկրաինայի անհետաձգելի ֆինանսական կարիքները 2026-2027 թվականներին, այդ թվում՝ ռազմական և պաշտպանական նպատակներով», – ասվում է հռչակագրում։
Փաստաթղթում նաև նշվում է, որ ԵՄ օրենսդրության համաձայն՝ «ռուսական ակտիվները պետք է մնան սառեցված մինչև Ռուսաստանը դադարեցնի Ուկրաինայի դեմ իր ագրեսիվ պատերազմը և փոխհատուցի պատերազմի պատճառած վնասը»։
Բացի այդ, ինչպես մամուլի ասուլիսում ասել է Եվրոպական խորհրդի նախագահ Անտոնիո Կոստան, Ռուսաստանը պետք է հասկանա, որ Ուկրաինան հաջորդ երկու տարիների ընթացքում կունենա պաշտպանության համար անհրաժեշտ ռեսուրսներ։
«Ռուսաստանը պետք է հստակ հասկանա, որ Ուկրաինան կունենա պաշտպանության համար անհրաժեշտ ֆինանսական ռեսուրսներ», – նշել է Կոստան։
