Խորհրդարանական մեծամասնության որոշմամբ՝ Վրաստանում կարգելվի փոխնակ մայրությունը
Վրաստանում որոշում է կայացվել արգելել փոխնակ մայրությունը։ Այս մասին հայտարարել է խորհրդարանական մեծամասնության ղեկավար Իրակլի Կիրցխալիան՝ մեծամասնության նիստից հետո։
Նրա խոսքով՝ այս հարցի շուրջ նրանք ակտիվորեն համագործակցում են Վրաստանի պատրիարքարանի հետ, և մոտ ապագայում կներկայացվի համապատասխան օրինագիծ։
Իրակլի Կիրցխալիան պարզաբանել է, որ այս որոշման հիմքում ընկած են փոխնակ մայրության հետ կապված էական էթիկական և իրավական ռիսկերը, մասնավորապես՝ մարդկանց թրաֆիքինգի, կանանց հնարավոր շահագործման և երեխաների իրավունքների պաշտպանության հետ կապված մտահոգությունները։
«Մենք լիովին գիտակցում ենք, որ փոխնակ մայրության արգելումը կարող է որոշակի տնտեսական հետևանքներ ունենալ, սակայն կարծում ենք, որ տնտեսական շահը չի կարող գերակշռել այդ ռիսկերին և էթիկական մտահոգություններին», – նշել է Իրակլի Կիրցխալիան։
Իրակլի Կիրցխալիան նշել է, որ այսօրվա որոշումը չի վերաբերում արհեստական բեղմնավորմանը (IVF):
«Այստեղ երկու ոլորտ կա. մեկը, այսպես կոչված, արհեստական բեղմնավորումն է։ Այն կմնա անփոփոխ՝ մի շարք պատճառներով և գործոններով պայմանավորված։ Այն կշարունակի ենթարկվել խիստ կարգավորման, ինչպես և հիմա է», – նշել է Կիրցխալիան։
Ըստ Իրակլի Կիրցխալիայի՝ նրանք պատրաստ են լսել փաստարկներ և պատասխանել ցանկացած հարցի, եթե հետաքրքրություն լինի։
«Փոխնակ մայրությունն ամբողջությամբ արգելվում է։ Հետաքրքիր կլինի տեսնել, թե ով կունենա սուր կամ բուռն արձագանք. մենք պատրաստ ենք լսել նման արձագանքները, քննարկում ծավալել և պատասխաններ տալ։ Հետաքրքիր կլինի իմանալ, թե ինչ փաստարկներ կներկայացնեն նրանք, ովքեր կտրուկ կարձագանքեն։ Ընդհանուր առմամբ, այս ոլորտը դարձել է չափազանց կոմերցիոնացված՝ զուգորդվելով այն ռիսկերով, որոնց մասին հակիրճ նշեցի։ Այժմ աշխատանքներ են տարվում օրինագծի ուղղությամբ, և ժամանակի ընթացքում դուք կիմանաք շատ ավելի մանրամասներ։ Եթե նայենք գործնական իրավիճակին, ապա փոխնակ մայրությունն արգելված է (կամ, առնվազն, ենթակա է չափազանց խիստ կարգավորման) գրեթե բոլոր երկրներում, այդ թվում՝ Եվրոպական միության անդամ երկրներում», – հայտարարել է Կիրցխալիան։