Վրաստանի վարչապետ Իրակլի Ղարիբաշվիլին հանդիպել է Վերակառուցման և զարգացման եվրոպական բանկի (EBRD) նախագահ Օդիլ Ռենո-Բասոյի հետ։

Վարչապետի մամուլի ծառայությունից հայտնում են, որ Գլազգոյում ընթացող ՄԱԿ-ի 2021 թվականի Կլիմայի փոփոխության 26-րդ համաժողովի շրջանակներում կայացած հանդիպմանը կարևորվել է Վրաստանի կառավարության և EBRD-ի միջև հաջող համագործակցությունը, որի արդյունքում երկրում իրականացվել են մի շարք կարևոր ծրագրեր։

Ըստ նրանց՝ EBRD-ի նախագահը կարևորել է Վրաստանում քաղաքական կայունությունը և նշել, որ ընտրություններից հետո անհրաժեշտ է կենտրոնանալ զարգացման օրակարգի վրա։

«Նշվեց, որ EBRD-ը մինչ այժմ ներդրել է մինչև չորս միլիարդ եվրո ավելի քան 250 նախագծերում, և որ ամենակարևորն է, պորտֆելի ամենամեծ մասը բաժին է ընկնում մասնավոր հատվածի վրա, ինչը էական ազդեցություն ունի երկրի տնտեսության զարգացման վրա։

Շեշտը դրվեց եվրաինտեգրման ճանապարհին Վրաստանի ընթացիկ բարեփոխումներին և տնտեսական վերափոխմանը EBRD-ի աջակցության հատուկ կարևորության վրա։

«Զրույցի թեմաներից են եղել Covid-19 համավարակի հետ կապված մարտահրավերները և EBRD-ի դերը՝ ինչպես դրանց արձագանքելու, այնպես էլ հետհամավարակային տնտեսության վերականգնման գործընթացում»,- ասվում է վարչապետի մամուլի գրասենյակի կողմից տարածած հաղորդագրության մեջ։

Վրաստանի վարչապետը և EBRD-ի նախագահը քննարկել են տարբեր ոլորտներում համագործակցության հնարավոր կոնկրետ ուղղությունները, ինչպես նաև փոքր և միջին ձեռնարկություններին աջակցելու կարևորությունը, ինչը կարևոր է երկրի տնտեսության կայունության և ներառականության ապահովման համար։

«EBRD-ի նախագահը վերահաստատել է Վերակառուցման և զարգացման եվրոպական բանկի հանձնառությունը՝ շարունակելու աջակցել Վրաստանին կորոնավիրուսի հետևանքով առաջացած մարտահրավերները հաղթահարելու և ուժեղ, կայուն և ներառական վերականգնման գործում:

Վերակառուցման և զարգացման եվրոպական բանկի (EBRD) առաջնահերթություններն են աջակցել մասնավոր հատվածի հետագա զարգացմանը, տնտեսության մեջ ավելի մեծ ներառականության ապահովումը, մարդկային կապիտալի հզորացումը, ենթակառուցվածքների, ինչպես նաև տրանսպորտի և կապի զարգացումը»,- նշված է վարչապետի մամուլի ծառայության հաղորդագրության մեջ։