Վրաստանի վարչապետ Իրակլի Կոբախիձեն մասնակցել է Եվրոպական քաղաքական միության (EPC) 7-րդ գագաթնաժողովի շրջանակներում կայացած «Տնտեսական անվտանգություն – Եվրոպական կախվածությունների նվազեցում» թեմայով վահանակային քննարկմանը։

Կառավարության աշխատակազմի haղորդմամբ, կլոր սեղանի շուրջ իր ելույթում կառավարության ղեկավարը խոսել է Վրաստանի տարանցիկ ներուժի և երկրի հատուկ դերի մասին Միջին միջանցքում։

Իրակլի Կոբախիձեն ընդգծել է Վրաստանի ռազմավարական դիրքը, հանքային պաշարների ոլորտում միջազգային համագործակցությունը և նշել, որ երկիրն ունի ներուժ՝ նպաստելու կարևորագույն հանքանյութերի կայուն և բազմազան մատակարարման շղթաների գոյությանը ոչ միայն Եվրամիության, այլև ամբողջ աշխարհի համար։

«Վրաստանի նպատակն է շարունակել զարգացնել Միջին միջանցքը՝ բարելավելով դրա արդյունավետությունը, դրանով իսկ ամրապնդելով միջանցքի դերը որպես հուսալի և մրցունակ Արևելք-Արևմուտք տրանսպորտային երթուղի: Վրաստանի ռազմավարական դիրքը թույլ է տալիս մեզ կատարել Միջին միջանցքում կենսականորեն կարևոր տարանցիկ դարպասի գործառույթը: Իր նավահանգստային, երկաթուղային և մայրուղային համակարգերի միջոցով մեր երկիրը նպաստում է բեռների արագ տեղաշարժին և մեծացնում է միջանցքի մրցունակությունը, ինչը ամրապնդում է Վրաստանի դերը համաշխարհային մատակարարման շղթաներում», – ասել է Իրակլի Կոբախիձեն։

Կառավարության ղեկավարը խոսել է երկրում իրականացվող խոշոր ենթակառուցվածքային նախագծերի, այդ թվում՝ Անակլիայի խորջրյա նավահանգստի կառուցման և երկաթուղու արդիականացման մասին, որը ծառայում է երկրի լոգիստիկ հնարավորությունների բարելավմանը։

Կլոր սեղանի շուրջ քննարկմանը, որը համանախագահում էին Իսլանդիայի և Իռլանդիայի վարչապետները, մասնակցել են Վրաստանի վարչապետը, Գերմանիայի կանցլեր Ֆրիդրիխ Մերցը, Մոնակոյի արքայազն Ալբերտ II-ը, Ադրբեջանի նախագահ Իլհամ Ալիևը, Մոնտենեգրոյի նախագահ Յակով Միլատովիչը, Շվեյցարիայի նախագահ Կարին Քելլեր-Սուտտերը, Սլովենիայի վարչապետ Ռոբերտ Գոլոբը, Կիպրոսի նախագահ Նիկոս Քրիստոդուլիդեսը, Գրենլանդիայի վարչապետ Յենս-Ֆրեդերիկ Նիլսենը և այլ առաջնորդներ։