Վրաստանի նավթի և գազի հետախուզման և արտադրության ոլորտ է մուտք գործել նոր միջազգային ներդրող՝ «Aspect Georgia LLC»-ն, որը 70 միլիոն ԱՄՆ դոլար կներդնի հետախուզման և արտադրության աշխատանքների պլանավորման և իրականացման մեջ, հաղորդում է Վրաստանի էկոնոմիկայի և կայուն զարգացման նախարարությունը։

Նրանց խոսքով՝ ընկերությունը միացել է այն ներդրողների խմբին, որոնք իրականացնում են լիցենզիայով նախատեսված աշխատանքները Արևելյան Վրաստանի XIQ լիցենզիայի տարածքում։

«Aspect Georgia LLC»-ին կփոխանցվի երեք կապալառու ընկերությունների՝ «Georgia Oil and Gas Limited»-ի, «Georgian Oil and Gas Corporation» ԲԲԸ-ի և GOG SLADS Limited-ի համատեղ նախագծի բաժնեմասը։ Նշված կապալառուների միջև XIQ լիցենզիայի տարածքի «Արտադրության բաժանման համաձայնագիրը» ստորագրվել է 2021 թվականի դեկտեմբերի 23-ին՝ Պետական ​​նավթի և գազի գործակալության կողմից անցկացված բաց միջազգային մրցույթի արդյունքում։

Պայմանագրի փոփոխությունը ստորագրել են Վրաստանի էկոնոմիկայի և կայուն զարգացման նախարարության Պետական ​​նավթի և գազի գործակալությունը, գործող կապալառու ընկերությունները՝ «Georgia Oil and Gas Limited»-ը (GOGL), «Georgian Oil and Gas Corporation» ԲԲԸ-ն, GOG SLADS Limited-ը և նոր ներդրողը՝ «Aspect Georgia LLC»-ն։ Ստորագրման արարողությանը ներկա էր էկոնոմիկայի և կայուն զարգացման փոխնախարար Ինգա Փխալաձեն։

«Aspect Georgia LLC»-ն գրանցված է ԱՄՆ Կոլորադո նահանգում և ամերիկյան նավթային հետախուզական խմբի՝ «Aspect Holding LLC»-ի դուստր ձեռնարկությունն է։ «Aspect Holding LLC»-ն ունի նավթի և բնական գազի հետախուզման և արդյունահանման բազմամյա հաջող փորձ, այդ թվում՝ բարդ երկրաբանական կառուցվածք ունեցող հանքավայրերում։ Ընկերությունը գործում է ԱՄՆ-ում, Կենտրոնական Եվրոպայում, Լատինական Ամերիկայում և Մերձավոր Արևելքում։