Վրաստանի դատախազությունը մեղադրանք է առաջադրել յոթ անձի՝ հոկտեմբերի 4-ի բողոքի ակցիայի ժամանակ լրագրողների մասնագիտական գործունեությանը խոչընդոտելու փաստերով։ Այս մասին տեղեկացնում է Վրաստանի դատախազությունը։

Ըստ գերատեսչության՝ կատարված քննությամբ հաստատվել է, որ 2025 թվականի հոկտեմբերի 4-ին Թբիլիսիում՝ Աթոնելի փողոցի և հարակից տարածքում ընթացող բողոքի ակցիայի ժամանակ մեղադրյալներ Ի. Ծ., Գ. Դ., Մ. Օ., Թ. Կ., Ի. Պ., Ա. Ծ. և Վ. Գ.՝ պղպեղի սփրեյի կիրառմամբ, ֆիզիկական միջամտությամբ և բռնության սպառնալիքով, ապօրինաբար խոչընդոտել են Հանրային Հեռարձակողի, «Իմեդի» և «Ռուսթավի 2» հեռուստաընկերությունների նկարահանող խմբերի մասնագիտական գործունեությանը։

Վեց մեղադրյալների նկատմամբ մեղադրանք է առաջադրվել Վրաստանի քրեական օրենսգրքի 154-րդ հոդվածի 1-ին մասով (լրագրողի մասնագիտական գործունեությանը ապօրինի խոչընդոտելը՝ հարկադրելով տարածել կամ հրաժարվել տեղեկատվություն տարածելուց), ինչը պատժվում է տուգանքով, հանրօգտակար աշխատանքներով, մինչև 2 տարվա ուղղիչ աշխատանքով կամ մինչև 2 տարի տնային կալանքով։

Մեղադրյալ Ի. Ծ.-ին մեղադրանք է առաջադրվել նույն հոդվածի 2-րդ մասով՝ բռնության սպառնալիքով լրագրողի մասնագիտական գործունեությանը ապօրինի խոչընդոտելու համար, ինչը կարող է նշանակել տուգանք կամ մինչև 2 տարվա ազատազրկում՝ պաշտոն զբաղեցնելու կամ մինչև 3 տարի որոշ գործունեություն իրականացնելու իրավունքի կորուստով կամ առանց դրա։

Դատախազությունը նախատեսում է օրենքով սահմանված ժամկետում դիմել Թբիլիսիի քաղաքային դատարան՝ մեղադրյալների նկատմամբ խափանման միջոց կիրառելու միջնորդությամբ։

Քննությունը շարունակվում է՝ հանցագործությանը մասնակից այլ անձանց ինքնությունը պարզելու նպատակով։