2026 թվականի հունիսից Թբիլիսին ուղիղ ավիաչվերթներով կկապվի ևս մեկ եվրոպական մայրաքաղաքի՝ Կոպենհագենի (Դանիայի Թագավորություն) հետ։ Նոր օդային գծով թռիչքները կիրականացնի հայտնի սկանդինավյան բյուջետային «Norwegian» ավիաընկերության դուստր ձեռնարկությունը՝ «Norwegian Air Sweden»-ը։ Այս մասին տեղեկատվություն է տարածում Վրաստանի էկոնոմիկայի նախարարությունը։

Նախարարության փոխանցմամբ՝ Քաղաքացիական ավիացիայի գործակալություն ներկայացված հայտի համաձայն՝ Թբիլիսիի և Կոպենհագենի միջև ուղիղ թռիչքները կմեկնարկեն հունիսի 27-ից՝ շաբաթական երկու անգամ հաճախականությամբ՝ յուրաքանչյուր չորեքշաբթի և շաբաթ օրերին, իսկ օգոստոսի 15-ից՝ յուրաքանչյուր չորեքշաբթի և կիրակի օրերին։

Վրաստանի էկոնոմիկայի և կայուն զարգացման նախարարության Քաղաքացիական ավիացիայի գործակալությունը ավիաընկերությանը թռիչքների իրականացման համար անհրաժեշտ թույլտվությունը տրամադրել է մարտի 23-ին։

Էկոնոմիկայի նախարարության տեղեկություններով՝ Կոպենհագեն-Թբիլիսի-Կոպենհագեն ուղղության ավելացումը կմեծացնի Վրաստանի կապը սկանդինավյան երկրների հետ և կնպաստի Հյուսիսային Եվրոպայից զբոսաշրջային հոսքերի աճին։ Բացի այդ, Կոպենհագենի օդանավակայանը հանդիսանում է եվրոպական տարածաշրջանի խոշորագույն տարանցիկ հաբերից մեկը, ինչը վրացի ուղևորներին լրացուցիչ հնարավորություն կտա Կոպենհագենի միջոցով մեկնել եվրոպական կամ ամերիկյան այլ ուղղություններով։