Վրաստանի առաջին տիկին Թամար Բագրատիոնին Վաշինգտոն է մեկնել ԱՄՆ առաջին տիկին Մելանյա Թրամփի հրավերով
Վրաստանի առաջին տիկին Թամար Բագրատիոնին մեկնել է Վաշինգտոն՝ ԱՄՆ առաջին տիկին Մելանյա Թրամփի հրավերով։ Այս մասին տեղեկատվություն է տարածել նախագահի աշխատակազմի մամուլի ծառայությունը։
Նրանց խոսքով՝ Թամար Բագրատիոնին կմասնակցի Մելանյա Թրամփի կողմից կազմակերպված «Միասին ավելի լավ ապագայի համար» գլոբալ գագաթնաժողովին, որի նպատակն է ապահովել առաջադեմ տեխնոլոգիաների անվտանգ և նորարարական օգտագործումը՝ երեխաների կրթության, զարգացման և բարեկեցության խթանման համար։
Գագաթնաժողովի շրջանակներում Մելանյա Թրամփը կլոր սեղանի ձևաչափով կհյուրընկալի նախագահների տիկնանց Սպիտակ տանը։ Քննարկումների նպատակն է գնահատել թվային դարաշրջանում երեխաների բարեկեցության համար առաջին դեմքերի տիկնանց աջակցությունը և քննարկել նրանց ընդհանուր պարտավորությունները։
Կլոր սեղանի հանդիպումից առաջ կկայանա աշխատանքային նիստ, որը կհյուրընկալի ԱՄՆ Պետդեպարտամենտը։ Աշխատանքային նիստը կներառի քննարկում, որի մասնակիցները կծանոթանան գործնական մոտեցումներին և նորարարական գործիքներին, որոնք կօգնեն երեխաներին օգտվել թվային դարաշրջանի հնարավորություններից և հաղթահարել մարտահրավերները։
Միջոցառումները կանցկացվեն մարտի 24-ին և 25-ին Մելանյա Թրամփի նախաձեռնությամբ կազմակերպված «Միասին ավելի լավ ապագայի համար» գլոբալ գագաթնաժողովի շրջանակներում: Վրաստանի առաջին տիկնոջ հետ միասին դրան կմասնակցեն նաև Վրաստանի կրթության, գիտության և երիտասարդության փոխնախարար Բայա Կվիցիանին և Վրաստանի խորհրդարանի կրթության, գիտության և երիտասարդության հարցերի հանձնաժողովի նախագահ Մարիամ Լաշխին: