Վրաստանի Առաջին ալիքը և Եվրոպական հեռարձակողների միությունը պաշտոնապես հայտարարում են, որ 2025 թվականի մանկական Եվրատեսիլ երգի մրցույթը կանցկացվի Թբիլիսիում դեկտեմբերի 13-ին։

Վրաստանը երկրորդ անգամ է հյուրընկալում «Մանկական Եվրատեսիլ» երգի մրցույթը։ Մրցույթն առաջին անգամ անցկացվել է Թբիլիսիում 2017 թվականին։ Վրաստանը «Մանկական Եվրատեսիլի» պատմության մեջ ամենահաջողակ մասնակից երկիրն է՝ չորս անգամ հաղթելով մրցույթում։

«Մենք անհամբեր սպասում ենք Վրաստան վերադառնալուն, Վրաստանը ուրախ է հյուրընկալել «Մանկական Եվրատեսիլ» երգի մրցույթը։ Հանրային հեռարձակողն արդեն ապացուցել է, որ կարող է ցուցադրել բացառիկ շոու, և մենք հավատում ենք, որ սա կլինի հատուկ միջոցառում, որը անմոռանալի հիշողություններ կթողնի թե՛ երիտասարդ մասնակիցների, թե՛ ամբողջ աշխարհի հեռուստադիտողների համար», – ասաց «Եվրատեսիլ» երգի մրցույթի տնօրեն Մարտին Գրինը։

«Մեզ համար մեծ պատիվ է կրկին Թբիլիսիում հյուրընկալել «Մանկական Եվրատեսիլ» երգի մրցույթը։ Սա մեզ համար հսկայական պատասխանատվություն է, և մենք ձգտում ենք շոուն դարձնել ավելի մեծ, քան երբևէ։ Մենք անհամբեր սպասում ենք մեր համաշխարհային ճանաչում ունեցող հյուրընկալությամբ հյուրընկալել երիտասարդ արտիստներին և երկրպագուներին ամբողջ աշխարհից և կիսվել մեր հարուստ մշակույթով և ժառանգությամբ», – ասաց Հանրային հեռարձակողի գլխավոր տնօրեն Թինատին Բերձենիշվիլին։

«Եվրատեսիլ»-ում Վրաստանի պատվիրակության ղեկավար Նաթիա Մշվենիերաձեն ասել է. «2017 թվականի մանկական Եվրատեսիլ երգի մրցույթը անմոռանալի փորձառություն էր։ Այս տարի մեր նպատակն է կազմակերպել ավելի տպավորիչ շոու, որը մեծ արձագանք կունենա տարիներ շարունակ»։

«Մանկական Եվրատեսիլ 2025»-ի անցկացման վայրի մասին պաշտոնական հայտարարությունը արվեց այսօր՝ Շվեյցարիայում Վրաստանի դեսպանատանը կայացած Վրաստանի մշակույթի օրվա ժամանակ, որին ներկա էին Շվեյցարիայում Վրաստանի դեսպան Շոթա Գեծաձեն, Եվրոպական հեռարձակողների միության գլխավոր տնօրենի տեղակալ և մեդիա տնօրեն Ժան-Ֆիլիպ դը Տենդերը՝ հրավիրված հյուրերի հետ միասին։

2025 թվականի «Մանկական Եվրատեսիլ» երգի մրցույթին կմասնակցեն 9-ից 14 տարեկան կատարողներ ամբողջ Եվրոպայից և դրանից դուրս։ Նրանցից յուրաքանչյուրը կներկայացնի երիտասարդությանը, երաժշտությանը և բազմազանությանը նվիրված ինքնատիպ երգ։ Մրցույթի վայրի, կարգախոսի և մասնակիցների կազմի մասին պաշտոնական տեղեկատվությունը կհրապարակվի մոտ ապագայում։

Նշենք, որ Վրաստանը 2024 թվականին իր չորրորդ հաղթանակը տարավ Իսպանիայի մայրաքաղաք Մադրիդում կայացած մրցույթում, երբ 11-ամյա Անդրիա Փուտկարաձեն վաստակեց մրցույթի պատմության մեջ ամենաբարձր՝ ռեկորդային 239 միավորը։ Այս հաղթանակով Վրաստանը երկրորդ անգամ նվաճեց միջազգային մրցույթը հյուրընկալելու իրավունքը։