Վոլոդիմիր Զելենսկի․ Ռուսաստանը շարունակում է հարձակումները էներգետիկ ոլորտի վրա, և մեր պատասխան գործողությունները շոշափելի են․ նոր զարգացումներ կան Սիզրանի նավթավերամշակման գործարանի հետ կապված
Վլադիմիր Զելենսկին հաստատել է, որ անցած գիշեր Ուկրաինան հարձակում է իրականացրել Ռուսաստանի Սիզրան քաղաքում գտնվող նավթավերամշակման գործարանի վրա։ Նա նաև հայտնել է, որ Ուկրաինան հարվածներ է հասցրել Տագանրոգում գտնվող անօդաչու թռչող սարքերի արտադրամասին և Սև ծովում տեղակայված ռուսական թիրախներին։
«Ռուսաստանը շարունակում է պարբերական հարձակումները մեր էներգետիկ ոլորտի, լոգիստիկայի և կենսական նշանակության ենթակառուցվածքների վրա։ Մեր պատասխան գործողությունները շոշափելի արդյունքներ են տալիս։ Ուկրաինայի պաշտպանության ուժերն արձանագրել են նոր հաջողություններ Սիզրանի նավթավերամշակման գործարանի ուղղությամբ։ Բացի այդ, հարված է հասցվել Տագանրոգում գտնվող անօդաչուների արտադրամասին, ինչպես նաև Օրյոլի մարզում տեղակայված՝ անօդաչուների կառավարման ուսուցման և արձակման կենտրոնին։ Հարվածներ են հասցվել նաև Սև ծովում գտնվող թիրախներին։ Շնորհակալություն եմ հայտնում մեր բոլոր մարտիկներին՝ հեռահար հարվածների արդյունավետության համար», – գրել է Զելենսկին։
Ուկրաինայի նախագահը մեկնաբանել է նաև ԱՄՆ-ի կողմից Ռուսաստանի «ՎՏԲ» բանկի (VTB Bank) նկատմամբ սահմանված նոր պատժամիջոցները՝ որպես Իրանի վրա գործադրվող տնտեսական ճնշման մաս, և դրանք որակել որպես «օգտակար քայլ»։ «Մեկ օր առաջ Միացյալ Նահանգները նաև կարևոր որոշում հայտարարեց Ռուսաստանի «ՎՏԲ» բանկի վերաբերյալ. սա Ռուսաստանի համակարգային նշանակություն ունեցող բանկերից է, որն ակտիվորեն ներգրավված է ռուսական ռազմական ջանքերին աջակցող սխեմաներում և, մասնավորապես, իրանական վարչակարգի հետ գործարքներում։ Խաղաղությունը խաթարող բոլոր նմանատիպ սխեմաները պետք է վերացվեն։ Շնորհակալություն եմ հայտնում մեր գործընկերներին այս օգտակար քայլի համար։ Այս պատերազմի ավարտին այլընտրանք չկա։ Ռուսաստանի վրա գործադրվող ճնշման յուրաքանչյուր ձև պետք է ստեղծի անհրաժեշտ դիվանագիտական պայմաններ։ Փա՛ռք Ուկրաինային», – գրում է Զելենսկին։