Ուկրաինայի և Ֆրանսիայի առաջնորդները, Մեծ Բրիտանիայի վարչապետի հետ միասին, հանդիպման ժամանակ զրուցել են ԱՄՆ նախագահի հատուկ ներկայացուցիչ Սթիվ Վիտկոֆի հետ։ Վոլոդիմիր Զելենսկին այս մասին գրել է սոցիալական ցանցերում։

Զելենսկին նշել է, որ առաջնորդները զրուցել են նաև Ուկրաինայի Ազգային անվտանգության և պաշտպանության խորհրդի քարտուղար Ռուստեմ Ումերովի հետ։

«Դա կարևոր ճեպազրույց էր։ Մենք համաձայնեցինք անձամբ քննարկել լրացուցիչ մանրամասները. թիմերը կհամաձայնեցնեն հնարավոր ապագա շփումների ժամանակացույցը», – գրել է Զելենսկին։

Սոցիալական ցանցերում մեկ այլ գրառման մեջ Ուկրաինայի նախագահը նշել է, որ պատերազմը պետք է հնարավորինս շուտ ավարտվի։

«Էմանուել Մակրոնի հետ մի քանի ժամ տևած զրույցի ընթացքում մենք քննարկել ենք կարևոր մանրամասներ։ Հիմնական ուշադրությունը կենտրոնացած էր պատերազմի ավարտի բանակցությունների և անվտանգության երաշխիքների վրա։ Խաղաղությունը պետք է լինի իսկապես կայուն։ Պատերազմը պետք է հնարավորինս շուտ ավարտվի։ Հիմա շատ բան կախված է յուրաքանչյուր առաջնորդի ներգրավվածությունից», – գրել է Զելենսկին։