Ուկրաինայի նախագահ Վոլոդիմիր Զելենսկին հայտարարել է, որ Ուկրաինան կլինի ԵՄ-ում՝ Օրբանի հետ, թե առանց դրա։ Ուկրաինայի նախագահն այս հայտարարությունն արել է այսօր Կիևում՝ Նիդեռլանդների վարչապետ Դիկ Շուպի հետ համատեղ մամուլի ասուլիսում։

Զելենսկին ասել է, որ վստահ է, որ հունգար ժողովուրդը ցանկացած դեպքում կաջակցի Ուկրաինային։

«Ուկրաինան կլինի ԵՄ-ում՝ Օրբանի հետ, թե առանց դրա, քանի որ սա ուկրաինացի ժողովրդի ընտրությունն է», – ասել է Զելենսկին։

Նա նաև մեկնաբանել է ԵՄ-ին անդամակցության ընթացակարգի փոփոխության հնարավորությունը, որի համաձայն՝ ԵՄ ընդլայնման համար միաձայն որոշում չի պահանջվի։

«Ընթացակարգի փոփոխությունը՝ սա կոչվում է ճանապարհ գտնել՝ դա անելու առանց Հունգարիայի, երբ մեծամասնությունը, բոլոր երկրները, բացի Հունգարիայից, աջակցում են Ուկրաինային և հասկանում են, որ դա անհրաժեշտ է», – ասել է Զելենսկին։

Նրա խոսքով՝ Ուկրաինան ավարտել է բոլոր տեխնիկական ընթացակարգերը՝ Ուկրաինայի՝ Եվրամիությանը անդամակցելու բանակցությունների գործընթացում առաջին կլաստերը բացելու համար։