Վոլոդիմիր Զելենսկի․ Այն պահից ի վեր, երբ Դոնալդ Թրամփը հայտարարեց «էներգետիկ զինադադարի» մասին, Ռուսաստանը 76 անգամ հարձակվել է Ուկրաինայի էներգետիկ ենթակառուցվածքների վրա
Ըստ Ուկրաինայի նախագահի՝ միայն անցած գիշեր Ռուսաստանը հարձակումներ է իրականացրել Վիննիցայի, Ժիտոմիրի, Խմելնիցկիի և Օդեսայի մարզերում գտնվող էլեկտրական ենթակայանների վրա։
«Տասնյակ հազարավոր ընտանիքներ մնացել են առանց էլեկտրականության։ Վերականգնողական աշխատանքներն իրականացվում են գրեթե շուրջօրյա։ Գիշերվա ընթացքում ռուսները հարձակվել են նաև մեր մարզերում գտնվող բնակելի տների վրա։ Այս պահի դրությամբ հաղորդվում է 12 վիրավորի մասին, այդ թվում՝ երկու երեխա։ Երկու մարդ զոհվել է։ Այս առավոտ թիրախավորվել է նաև գյուղատնտեսական ձեռնարկություն Վոլինի մարզում», – նշել է Զելենսկին։
Ըստ Զելենսկիի՝ անցած շաբաթվա ընթացքում Ռուսաստանն Ուկրաինայի դեմ կիրառել է 2700 անօդաչու թռչող սարք, 1700 ավիառումբ և 66 հրթիռ, որոնց մեծ մասը՝ բալիստիկ։
Նա հայտարարել է, որ այդ հարվածների հիմնական թիրախը էներգետիկ ենթակառուցվածքներն են եղել։ Ուկրաինայի նախագահը պնդել է, որ Ռուսաստանը փորձում է երկրում ամբողջական էլեկտրաէներգիայի անջատում (բլեքաութ) առաջացնել։
«Ամերիկան պետք է տեսնի, որ Ռուսաստանը պատասխան քայլեր չի ձեռնարկում՝ ի պատասխան պատժամիջոցների մեղմացման կամ համաձայնագրերի կնքման։ Ընդհակառակը, նրանք եկամուտ ստանալու հնարավորության մասին ցանկացած ազդանշան ընկալում են որպես հաստատում այն բանի, որ պատերազմի վրա կատարված իրենց խաղադրույքն արդարացնում է իրեն, և որ նրանք կարող են շարունակել պայքարը», – նշել է Զելենսկին։