Եվրոպական հանձնաժողովի նախագահ Ուրսուլա ֆոն դեր Լեյենը նշել է, որ օդային տարածքում անօդաչու թռչող սարքերի հետ կապված վերջին միջադեպերը ցույց են տալիս, որ Եվրոպան բախվում է հիբրիդային պատերազմի, որին անհրաժեշտ է հակազդել։

Նա ասել է, որ դա հետևողական արշավ է։

«Սա պատահական ոտնձգություն չէ, սա հետևողական արշավ է, որի նպատակն է զայրացնել մեր քաղաքացիներին, փորձարկել մեր վճռականությունը, պառակտել մեր միասնությունը և թուլացնել Ուկրաինայի նկատմամբ մեր աջակցությունը։ Ժամանակն է ավարտել այն։ Սա հիբրիդային պատերազմ է», – ասել է ֆոն դեր Լեյենը Ստրասբուրգում Եվրոպական խորհրդարանում ունեցած ելույթում։

Եվրահանձնաժողովի նախագահն ասել է, որ Ռուսաստանի նպատակն է «բաժանում սերմանել» Եվրոպայում։

«Մենք կարող ենք կամ հետևել Ռուսաստանից եկող սպառնալիքների սրմանը, կամ դիմակայել դրանց միասնությամբ և վճռականությամբ», – ասել է Ուրսուլա ֆոն դեր Լեյենը։