Ուկրաինան հարվածել է Սարատովի նավթավերամշակման գործարանին, որը տարեկան մշակում է մինչև յոթ միլիոն տոննա նավթ, հաստատել է Ուկրաինայի զինված ուժերի գլխավոր շտաբը։

Ինչպես նշվում է հայտարարության մեջ, սա Ռուսաստանի վառելիքային ենթակառուցվածքների հիմնական օբյեկտներից մեկն է։

Ըստ հաղորդագրությունների, անօդաչու թռչող սարքի հարվածի հետևանքով ձեռնարկության տարածքում նկատվել են պայթյուններ և հրդեհներ։

«Ուկրաինայի պաշտպանության ուժերը շարունակում են համակարգված միջոցներ ձեռնարկել՝ ուղղված թշնամու ռազմատնտեսական ներուժի նվազեցմանը՝ նրան ստիպելու դադարեցնել մեր պետության դեմ զինված ագրեսիան։ Ռուսաստանի տարածքում գտնվող յուրաքանչյուր վնասված օբյեկտ, որը մասնակցում է Ուկրաինայի դեմ հանցավոր պատերազմի ապահովմանը, մեզ ավելի է մոտեցնում արդար խաղաղությանը», – ասվում է Ուկրաինայի զինված ուժերի գլխավոր շտաբի հայտարարության մեջ։