Ուկրաինայի հակակոռուպցիոն մարմինները բացահայտել են հանցավոր սխեմա, որում ներգրավված են եղել գործող պատգամավորներ։ Այս մասին տեղեկություն է տարածել ուկրաինական մեդիան։

Լրատվամիջոցների տվյալներով՝ քննության շրջանակում պարզվել է, որ պատգամավորները պարբերաբար կաշառք են ստացել Ուկրաինայի Գերագույն ռադայում որոշակի քվեարկություններին մասնակցելու և կողմ քվեարկելու դիմաց։ Գործի այլ մանրամասները դեռևս անհայտ են։

Ավելի վաղ մեդիան հայտնել էր, որ Ուկրաինայի հակակոռուպցիոն բյուրոյի քննիչները գաղտնի դիտարկում են իրականացրել իշխող «Ժողովրդի ծառա» ֆրակցիայի անդամ Յուրի Կիսելի նկատմամբ։

Լրատվամիջոցների փոխանցմամբ՝ քննության ընթացքում Ուկրաինայի Ազգային հակակոռուպցիոն բյուրոյի աշխատակիցները փորձել են մուտք գործել օրենսդիր մարմնի շենք, սակայն բախվել են Պետական պաշտպանության ծառայության դիմադրությանը։ Ինչպես գրում է ուկրաինական մեդիան, հետաքննիչներին ի վերջո ներս են թողել շենք։