Վլադիմիր Զելենսկին պնդում է, որ Ուկրաինայում պետական հեղաշրջում էր նախապատրաստվում
Ուկրաինայի նախագահ Վլադիմիր Զելենսկին հայտարարել է, որ Ուկրաինայում պետական հեղաշրջում էր նախապատրաստվում։ Ինչպես գրում է ուկրաինական «Ունիան» հրատարակությունը, Զելենսկին այդ մասին հայտարարել է մամուլի ասուլիսում:
Նրա խոսքով՝ իշխանությունը տեղեկություն ունի, որ Ուկրաինայի եւ Ռուսաստանի առանձին ներկայացուցիչների միջեւ քննարկվել է գործարար Ռինատ Ախմետովի հնարավոր մասնակցությունը Ուկրաինայում պետական հեղաշրջմանը։
Ինչպես նշել է Զելենսկին, հեղաշրջումը նախատեսված էր դեկտեմբերի 1-2-ը։
«Կարող եմ ասել, որ մենք ունենք ոչ միայն հետախուզական, այլեւ ձայնային տեղեկատվություն, որտեղ Ուկրաինայի ներկայացուցիչները Ռուսաստանի ներկայացուցիչների հետ քննարկում են Ուկրաինայում հեղաշրջմանը Ռինատ Ախմետովի մասնակցությունը, խոսում են, որ միլիարդ դոլար է ներգրավվելու եւ այլն»,- ասել է Ուկրաինայի նախագահը։
Ինչպես նշել է Վլադիմիր Զելենսկին, կարծում է, որ սա գործողություն է, որով փորձում են գործարար Ախմետովին ներքաշել ուկրաինական պետության դեմ պատերազմի մեջ։
«Կարծում եմ՝ նա սկսեց դա։ Կարծում եմ, ցավոք, դա կլինի նրա մեծ սխալ, քանի որ չի կարելի պատերազմ սկսել սեփական ժողովրդի, Ուկրաինայի ժողովրդի կողմից ընտրված նախագահի դեմ»,- ասել է նախագահը։
Միաժամանակ, ըստ Զելենսկու, իշխանությունն ունի համապատասխան ձայնագրություն, որում քննարկվում է հեղաշրջման հարցը։ Զելենսկին, սակայն, ասել է, որ պատրաստ չէ խոսել գործի մանրամասների մասին։