Ուկրաինայի նախագահ Վլադիմիր Զելենսկին հայտարարել է, որ ռուսական հարձակումների հետևանքով վնասված «Դրուժբա» նավթամուղի վերանորոգումը կավարտվի գարնանը:

Վլադիմիր Զելենսկու հայտարարության համաձայն՝ Ուկրաինան, Եվրահանձնաժողովի հետ ձեռք բերված պայմանավորվածության համաձայն, կվերականգնի նավթամուղը: Մարտին Եվրամիությունը Կիևին ֆինանսական և փորձագիտական աջակցություն է առաջարկել, որպեսզի «Դրուժբայի» միջոցով դեպի Հունգարիա և Սլովակիա ռուսական նավթի մատակարարումը վերականգնվի:

«Եթե նավթի մատակարարման հնարավորության դիմաց եվրոպական ֆինանսավորման հարցը կրկին բարձրանա, մենք արդեն ասել ենք, թե երբ կվերանորոգենք «Դրուժբա» նավթամուղը: Մատակարարման պատասխանատվությունը կրում են եվրոպացիները: Մենք կվերանորոգենք այն, քանի որ դա է պայմանավորվածությունը: Ես նրանց ասել եմ, որ դա կավարտենք գարնանը: Շատ բան արդեն արված է», – հայտարարել է Ուկրաինայի նախագահը:

Միևնույն ժամանակ, Վլադիմիր Զելենսկու խոսքով, Կիևը չի կարող պատասխանատու լինել տարանցման անվտանգության համար, եթե Ռուսաստանը կրկին հարձակումներ իրականացնի նավթամուղի օբյեկտների վրա: Նրա խոսքով՝ ոչնչացված ջրամբարների արագ վերանորոգումն անհնար է։

Ինչ վերաբերում է Հունգարիայում կայանալիք խորհրդարանական ընտրություններին, Զելենսկին նշել է, որ Ուկրաինան չի միջամտում հարևան երկրի ընտրական գործընթացին։