Ուկրաինայի նախագահ Վլադիմիր Զելենսկին հայտարարել է, որ Ղրիմի կամուրջը օրինական թիրախ է Ուկրաինայի համար, քանի որ դրա միջոցով զենք է փոխանցվում օկուպանտներին։ Զելենսկու խոսքով՝ այդ թիրախը պետք է «չեզոքացվի»։ Այս մասին Զելենսկին հայտարարել է Ասպենի անվտանգության ֆորումում ունեցած ելույթի ժամանակ։

«Նպատակը ամբողջ Ղրիմը վերադարձնելն է, քանի որ դա մեր ինքնիշխան տարածքն է։ Կերչի կամուրջը փոքր լոգիստիկ ճանապարհ չէ։ Այն օգտագործվում է զինամթերք տեղափոխելու և Ղրիմի թերակղզին ռազմականացնելու համար։ Մեզ համար պարզ է, որ դա թշնամու օբյեկտ է, որը կառուցվել է միջազգային իրավունքի խախտմամբ, ուստի պարզ է, որ դա մեր թիրախն է, և ցանկացած թիրախ, որը պատերազմ է բերում, այլ ոչ թե խաղաղություն, պետք է չեզոքացվի»,- ասել է Զելենսկին։

Ասպենի ֆորումում Զելենսկին նաև նշել է, որ Ուկրաինայի հակահարձակումը սպասվածից ավելի դանդաղ է զարգանում, քանի որ գործողությունը սկսվել է նախատեսվածից ուշ։

«Քանի որ մենք մի փոքր ուշ սկսեցինք, դա Ռուսաստանին հնարավորություն տվեց ականապատել մեր հողը և կառուցել մի քանի պաշտպանական գիծ»,- ասել է Ուկրաինայի ղեկավարը։

Զելենսկին միաժամանակ նշել է, որ, չնայած բոլոր դժվարություններին, Ուկրաինան առաջ է շարժվում։

«Մենք չէինք ուզում կորցնել մեր ժողովրդին, մեր կադրերին ու զինվորականներին, մենք չէինք ուզում կորցնել մեր տեխնիկան, և այդ պատճառով մենք շատ զգուշավոր էինք հարձակողական գործողությունների նկատմամբ։ Ես կասեի, որ մենք մոտենում ենք այն պահին, երբ հակաքայլերը կարող են արագացնել, քանի որ մենք արդեն անցնում ենք որոշ վայրերով, որտեղ կան ականներ, և մենք ականապատելու ենք այդ տարածքները»,- ասել է Զելենսկին։