Վենեսուելան դիմել է ՄԱԿ-ի Անվտանգության խորհրդին՝ ԱՄՆ-ի կողմից իր ափամերձ տարածքում իրականացված հարվածները ապօրինի ճանաչելու և երկրի ինքնիշխանությանը աջակցելու կոչով, – հայտնում է «Reuters»-ը։

ՄԱԿ-ում Վենեսուելայի դեսպան Սամուել Մոնկադան Անվտանգության խորհրդին ուղղված նամակում պահանջում է հետաքննել ԱՄՆ-ի կողմից իրականացված այն հարվածները, որոնք, ըստ հաղորդումների, նվազագույնը 27 մարդու կյանք են խլել։

«Խորհուրդը պետք է հայտարարություն ընդունի, որով կրկին կհաստատի պետությունների, այդ թվում՝ Վենեսուելայի ինքնիշխանության, քաղաքական անկախության և տարածքային ամբողջականության լիարժեք հարգման սկզբունքը», – նշված է ՄԱԿ-ի Անվտանգության խորհրդի 15 անդամներին ուղղված նամակում։

Հիշեցնենք, որ ԱՄՆ նախագահ Դոնալդ Թրամփը հրահանգել է ամրապնդել ԱՄՆ զինված ուժերի ներկայությունը Կարիբյան ծովի հարավային հատվածում և Կենտրոնական հետախուզական վարչությանը (CIA) թույլատրել գաղտնի գործողություններ իրականացնել Վենեսուելայում։

Ամերիկյան զինվորականները նվազագույնը հինգ գործողություն են իրականացրել այն նավերի դեմ, որոնք, ԱՄՆ նախագահի վարչակազմի հայտարարությամբ, ներգրավված են եղել թմրանյութերի առևտրում։