Թուրքիայի նախագահ Ռեջեփ Թայիփ Էրդողանի վարչակազմը Էմանուել Մակրոնի հետ հանդիպման ժամանակ կենտրոնացել է Թուրքիայի հետ վիզային ռեժիմի ազատականացման ԵՄ խոստման վրա
Թուրքիայի նախագահ Ռեջեփ Թայիփ Էրդողանը Եվրոպական քաղաքական միության գագաթնաժողովի շրջանակներում հանդիպել է Ֆրանսիայի նախագահ Էմանուել Մակրոնի հետ։
Ինչպես գրառում է Թուրքիայի պետական լրատվական գործակալությունը՝ հիմնվելով Թուրքիայի նախագահի վարչակազմի հայտարարության վրա, Ռեջեփ Թայիփ Էրդողանը Մակրոնին հիշեցրել է Եվրամիության կողմից Թուրքիայի հետ վիզային ռեժիմի ազատականացման խոստումը։
Թուրքիայի նախագահի վարչակազմի հայտարարության համաձայն՝ հանդիպման ընթացքում կողմերը քննարկել են տարածաշրջանային և գլոբալ խնդիրներ։ Ինչպես նշվում է հայտարարության մեջ, բանակցությունների ընթացքում նախագահ Էրդողանն ասել է, որ Թուրքիայի և Ֆրանսիայի հարաբերությունները հիմնված են խոր պատմության վրա և առևտրատնտեսական հարաբերությունների խորացումը շահավետ կլինի երկու երկրների համար։
Էրդողանի խոսքով՝ Եվրամիության հետ Թուրքիայի հարաբերություններն առաջնորդվում են Եվրամիության լիիրավ անդամակցության հեռանկարով։ Նախագահ Էրդողանը կոչ է արել ակտիվացնել այս գործընթացը։ Նա ընդգծեց, որ մաքսային միության նորացման, վիզային ռեժիմի ազատականացման հետ կապված խոստումները պետք է կատարվեն։ Էրդողանը նշել է, որ բոլոր երկրների շահերից է բխում Ուկրաինայի ու Ռուսաստանի, Իսրայելի ու Պաղեստինի, Իսրայելի ու Լիբանանի միջև լարվածությունը խաղաղ ճանապարհով, դիվանագիտական ճանապարհով դադարեցնելը։