Թուրքիան վերացնում է Հայաստանի հետ երկկողմ առևտրի սահմանափակումները
Թուրքիան վերացրել է Հայաստանի հետ երկկողմ առևտրի սահմանափակումները։
ՀՀ արտաքին գործերի նախարարության մամուլի խոսնակ Անի Բադալյանը հայտարարել է, որ Երևանը ողջունում է Թուրքիայի որոշումը՝ վերացնելու Հայաստանի հետ երկկողմ առևտրի խոչընդոտները, որը Հայաստանի և Թուրքիայի միջև հարաբերությունների կարգավորման գործընթացի ևս մեկ արդյունք է։
«Այս որոշումը անհրաժեշտ է երկու երկրների միջև առևտրային և գործարար կապերի ընդլայնման, տարածաշրջանում տնտեսական ինտեգրման խթանման, ինչպես նաև խաղաղության և բարգավաճման ապահովման առումով։ Մենք ընդգծում ենք, որ սա կարևոր քայլ է երկու երկրների միջև լիարժեք և նորմալ հարաբերությունների զարգացման ուղղությամբ, որոնք տրամաբանորեն կարող են շարունակվել հայ-թուրքական սահմանի բացմամբ և դիվանագիտական հարաբերությունների հաստատմամբ», – ասվում է ՀՀ արտաքին գործերի նախարարության մամուլի խոսնակի հայտարարության մեջ։
Միևնույն ժամանակ, Թուրքիայի արտաքին գործերի նախարարության մամուլի խոսնակ Օնջու Քեչելը հայտարարել է, որ Թուրքիայի և Հայաստանի միջև ուղիղ առևտրի մեկնարկի հետ կապված բյուրոկրատական գործընթացն ավարտվել է 2026 թվականի մայիսի 11-ի դրությամբ։
«Երկու երկրների միջև ընդհանուր սահմանը բացելու համար անհրաժեշտ տեխնիկական և բյուրոկրատական աշխատանքները դեռևս շարունակվում են», – ասել է Օնջու Քեչելը։