«Ցավոք, որոշ ժողովրդավարական քաղաքական կուսակցությունները չդիմացան գայթակղությանը, բայց «Միացյալ ազգային շարժումը», ինչպես վերջին 13 տարիների ընթացքում, այսօ՛ր, վա՛ղը եւ հոկտեմբերի 4-ին կլինի պայքարի առաջնագծում եւ անպայման կբարձրացնի հաղթանակի դրոշը Իվանիշվիլիի ռեժիմի դեմ», – այս մասին հայտարարեց «Միացյալ ազգային շարժման» նախագահ Թինա Բոքուչավան՝ կուսակիցների՝ քաղաքային խորհրդի անդամների հետ միասին Մզիուրում կայացած բրիֆինգի ժամանակ։

Բոքուչավայի խոսքով՝ այսօր «Միացյալ ազգային շարժման» անդամները մեկ անգամ եւս հավաքվել էին՝ ընդգծելու համար, որ չեն մասնակցելու հոկտեմբերի 4-ի ընտրություններին։

«Մենք կրկին հավաքվել ենք՝ «Միացյալ ազգային շարժման» անունից, քաղաքային խորհուրդների 378 անդամի անունից ասելու՝ «Ո՛չ» հոկտեմբերի 4-ի ռուսական հատուկ օպերացիային եւ պայքարելու բացառապես ազատ եւ արդար նոր խորհրդարանական ընտրությունների համար։

Ցավոք, որոշները չդիմացան գայթակղությանը, այդ թվում՝ որոշ ժողովրդավարական քաղաքական կուսակցություններ, բայց «Միացյալ ազգային շարժումը», ինչպես վերջին 13 տարիներին, այսօր, վաղը, հոկտեմբերի 4-ին կլինի պայքարի առաջնագծում եւ անպայման կբարձրացնի հաղթանակի դրոշը Իվանիշվիլիի ռեժիմի դեմ։

Մենք տեսնում ենք, որ գրեթե ամեն օր միջազգային հարթակում հայտարարություններ են արվում։ Այսօր, մասնավորապես, Եվրոպական խորհրդարանը հայտարարեց, որ չի ճանաչում Իվանիշվիլիի ոչ լեգիտիմ իշխանությունը, չի համագործակցելու ռուսական ռեժիմի հետ եւ կհամագործակցի միայն այն իշխանության հետ, որը Եվրոպայի ճանապարհով կտանի մեր երկրին՝ նոր ազատ խորհրդարանական ընտրությունների արդյունքում։

Շատ կարեւոր է, որ այսօր իմ կողքին են «Միացյալ ազգային շարժման» քաղաքային խորհրդի անդամները։ Սրանք այն մարդիկ են, ովքեր շատ լավ գիտեն պայքարի արժեքը գյուղերում, փոքր քաղաքներում, քաղաքներում, Վրաստանի յուրաքանչյուր անկյունում եւ բոլոր տարածաշրջաններում։ Այո՛, հենց այս անպարտ մարդիկ են, որ Վրաստանի ազատությունն ու պետականությունը պահպանել են մինչ օրս՝ Իվանիշվիլիի դավաճանական ռեժիմի ջանքերի դեմ։ Վաղը հենց այս թիմը՝ հենց «Միացյալ ազգային շարժումը» կրկին կբարձրացնի հաղթանակի դրոշը։ Այդ հաղթանակը գալիս է սկզբունքայնության, անզիջողականության, պայքարի շնորհիվ։ Հենց այսպես՝ միասնությամբ, սկզբունքայնությամբ եւ անզիջողականությամբ մենք անպայման կբարձրացնենք հաղթանակի դրոշը», – ասել է Թինա Բոքուչավան։