«Վրացական երազանքի» գրասենյակում տեղի է ունեցել Խորհրդարանական մեծամասնության նիստ
«Վրացական երազանքի» Գորգասալիի գրասենյակում տեղի է ունեցել Խորհրդարանական մեծամասնության նիստը, որին մասնակցել է կուսակցության նախագահ, վարչապետ Իրակլի Կոբախիձեն։
«Վրացական երազանքի» մամուլի ծառայության հաղորդմամբ, նիստը նվիրված էր Վրաստանի և Չինաստանի հարաբերություններին և Չինաստանի Ժողովրդական Հանրապետության փոխնախագահ Հան Ճենգի Վրաստան կատարած այցի ամփոփմանը։ Նշվել է, որ Վրաստանը տարածաշրջանում առաջին երկիրն է, որի հետ Չինաստանը ստորագրել է համապարփակ ռազմավարական գործընկերության պայմանագիր, ինչը կարևոր և ողջունելի զարգացում է։
«Հանդիպման ժամանակ մանրամասն քննարկվել են Չինաստանի փոխնախագահի պաշտոնական այցի շրջանակներում կայացած հանդիպումները։ Ընդգծվել է Չինաստանի նման ուժեղ ռազմավարական գործընկեր ունենալու կարևորությունը Վրաստանի համար։
Քննարկման ընթացքում անդրադարձ է եղել նաև վրացական պատվիրակության Չինաստան կատարած այցին։ Մեծամասնության անդամները կենտրոնացել են երիտասարդական ոլորտում հարաբերությունների խորացման, կրթական և մշակութային կապերի ամրապնդման, ինչպես նաև զբոսաշրջության ոլորտում համագործակցության ակտիվացման վրա։
Հանդիպման ժամանակ քննարկվել են նաև վարչապետի կողմից արդեն իսկ իրականացված և ապագայում նախատեսված արտասահմանյան այցերը», – հայտնել է «Վրացական երազանքի» մամուլի ծառայությունը։
Նրանց խոսքով՝ մեծամասնության անդամները քննարկել են ընթացիկ նստաշրջանային շաբաթվա լիագումար նիստերում քննարկվելիք հարցերը։
«Հանդիպման ժամանակ անդրադարձ է եղել նաև արտաքին և ներքին քաղաքականության տարբեր կարևոր թեմաների։ Դրանց թվում քննարկվել են Սահմանադրական դատարանում ընթացող նիստերին վերաբերող հարցեր։
Բացի այդ, հանդիպման ընթացքում քննարկվել է պետական բյուջեի նախագիծը, որը կշարունակվի քննարկվել խորհրդարանական հանձնաժողովներում, և դրա վերջնական հաստատումը նախատեսված է տարեվերջին», – ասվում է «Վրացական երազանքի» մամուլի ծառայության հաղորդագրության մեջ։