The Wall Street Journal – Դոնալդ Թրամփը ցանկանում է հանդիպել Կիմ Չեն Ընի հետ աշնանը, սակայն հնարավոր հանդիպման պաշտոնական նախապատրաստական աշխատանքները դեռ չեն սկսվել
ԱՄՆ նախագահ Դոնալդ Թրամփը ցանկանում է հանդիպել Հյուսիսային Կորեայի առաջնորդ Կիմ Չեն Ընի հետ աշնանը, հաղորդում է Wall Street Journal-ը։
Հրապարակման աղբյուրների համաձայն՝ ԱՄՆ նախագահը անձամբ քննարկել է Հյուսիսային Կորեայի առաջնորդի հետ անձնական հանդիպում պլանավորելու հնարավորությունը Ասիա կատարելիք իր հաջորդ ուղևորության ընթացքում, որը կարող է տեղի ունենալ նոյեմբերին։
Այնուամենայնիվ, ինչպես նշել են աղբյուրները, հնարավոր հանդիպման պաշտոնական նախապատրաստական աշխատանքները դեռ չեն սկսվել։
«Չնայած Թրամփը անձնական հանդիպումը համարում է Հյուսիսային Կորեայի հետ երկխոսությունը վերսկսելու հնարավորություն, վերլուծաբանները, ինչպես նաև որոշ ամերիկացի պաշտոնյաներ ասում են, որ չեն սպասում էական առաջընթացի, քանի որ Հյուսիսային Կորեայի միջուկային զինանոցը միայն աճել է Դոնալդ Թրամփի և Կիմ Չեն Ընի միջև նախորդ երեք գագաթնաժողովներից ի վեր», – գրում է հրատարակությունը։
Ըստ հաղորդագրությունների՝ իր առաջին նախագահական ժամկետի ընթացքում Դոնալդ Թրամփը երեք հանդիպում է ունեցել Կիմ Չեն Ընի հետ՝ Սինգապուրում, Հանոյում և երկու Կորեաների սահմանին։ Հարկ է նշել, որ սա առաջին դեպքն էր, երբ ԱՄՆ գործող նախագահը ոտք դրեց Հյուսիսային Կորեայի հողի վրա: Ըստ Wall Street Journal-ի՝ նրանց դիվանագիտությունը որևէ կոնկրետ արդյունք չի տվել, չնայած Թրամփը դրականորեն է արտահայտվել բանակցությունների մասին և ասել, որ Հյուսիսային Կորեայից այլևս միջուկային սպառնալիք չկա: