Մերձավոր Արևելքում պատերազմի ավարտի հեռանկարների շուրջ հեռախոսազրույց է տեղի ունեցել Իրանի նախագահ Մասուդ Փեզեշքիանի և Պակիստանի վարչապետ Շեհբազ Շարիֆի միջև։

Պակիստանի վարչապետ Շեհբազ Շարիֆը հայտարարել է, որ Իրանի նախագահի հետ «լայնածավալ քննարկումներ» է անցկացրել տարածաշրջանում ընթացող ռազմական գործողությունների և պատերազմի դադարեցմանն ուղղված ջանքերի վերաբերյալ։

Նրա խոսքով՝ Փեզեշքիանին տեղեկացրել են Պակիստանի արտաքին գործերի նախարար Իշակ Դարի և բանակի հրամանատար, ֆելդմարշալ Ասիմ Մունիրի դիվանագիտական ջանքերի մասին՝ ուղղված Միացյալ Նահանգների, ինչպես նաև Պարսից ծոցի և այլ իսլամական երկրների հետ աշխատանքին՝ խաղաղ բանակցությունների համար բարենպաստ պայմաններ ստեղծելու նպատակով։

Շարիֆը հույս է հայտնել, որ հնարավոր կլինի համատեղ ուժերով գտնել ռազմական գործողությունների դադարեցման կենսունակ ուղի։

Հայտարարության համաձայն՝ Փեզեշքիանը գովել է Պակիստանի խաղաղարար ջանքերը և ընդգծել վստահության վերականգնման անհրաժեշտությունը՝ երկխոսությանն ու միջնորդությանը նպաստելու համար։