Տարածաշրջանային զարգացման նախարարի առաջին տեղակալը, Իմերեթի նահանգապետը և Տղիբուլիի քաղաքապետը այցելել են Կուրսեբ գյուղում տեղի ունեցած սողանքից տուժած բնակչությանը
Տղիբուլիի մունիցիպալիտետի Կուրսեբի գյուղում զարգացած սողանքային գործընթացի հետևանքով տուժած բնակչությանն այցելել են Վրաստանի տարածաշրջանային զարգացման նախարարի առաջին տեղակալ Լևան Զաուտաշվիլին, Իմերեթիում պետական լիազոր Լևան Զալկալիանին և Տղիբուլիի մունիցիպալիտետի քաղաքապետ Դավիթ Կուբլաշվիլին։
Տղիբուլիի քաղաքապետարանի փոխանցմամբ՝ իշխանության ներկայացուցիչները ծանոթացել են հյուրանոցներում ժամանակավորապես տեղավորված ընտանիքների վիճակին, տեղեկատվություն են ստացել առկա կարիքների մասին և պլանավորել են օպերատիվ արձագանքման համար ձեռնարկվելիք միջոցառումները։
«Տուժած ընտանիքներին նաև տրամադրվել է վերջին տեղեկատվությունը տարերային աղետի գոտում տիրող իրավիճակի մասին։ Բնակչությանն անհրաժեշտության դեպքում կցուցաբերվի համապատասխան բժշկական օգնություն։ Զուգահեռաբար, օպերատիվ կերպով իրականացվում է նրանց լիարժեք ապահովումը առաջին անհրաժեշտության պարագաներով, սննդով և դեղորայքով։ Աղետի գոտուց տարհանվել է 45 ընտանիք, որոնք տեղավորվել են Տղիբուլիի և Քութայիսի հյուրանոցներում։
Հատկանշական է, որ այս պահին Քութայիսի-Տղիբուլի-Ամբրոլաուրի կապող ավտոճանապարհի վեցերորդ կիլոմետրին երթևեկությունը դադարեցված է, քանի որ սողանքը հանգեցրել է ճանապարհի վնասմանն ու փակմանը։ Դեպի Քութայիսի ավտոտրանսպորտը երթևեկում է Մաղարո գյուղի միջով՝ տեղական նշանակության ճանապարհով։ Կուրսեբի գյուղի Բերոձեների և Գոգոլաշվիլիների թաղամասերում զարգացած սողանքային գործընթացների պատճառով ստեղծված արտակարգ շտաբը շարունակում է աշխատանքը 24-ժամյա ռեժիմով», – նշված է Տղիբուլիի մունիցիպալիտետի քաղաքապետարանի տեղեկատվության մեջ։